Read Kambera PAMALANGUNGU 56 Bible Online

PAMALANGUNGU 56 - Kambera bible

PAMALANGUNGU 56

¹Nduma ma-kapipi tau maludu. Pa-namatungu la wiliku: Na kulundiha na mapàdi wana, welingu la mamarau. Pamalangungu-na i Ndautu ba nayàpa-ya tau Pilitingu la Nggàta.

²Milangga eti, ou Ala, ba na-hànjalu-ka muhu, pa-nutakungu-madanya da muhu pa-roduku-ngga.

³Malo - lodungu ba da-tarohaku-ka papanggu; nadangu na mamuhu-ngga nyungga, dou Ala Hupu Majangga.

⁴La rehi mangàdatu-nggu, kumonu-nggau Nyumu.

⁵Kuwotu-nya i Ala rukuna na panjanji-nangga; kuwaiya Nyuna, hi nda ku-mangàdatu, nda jia nggiki-anangga tau.

⁶Malo - lodungu na-pahanduka-ka muhu, panutakungu-madanya ba dawuku-ya la pa-hanggàmaru-ka.

⁷Da-kanguhuru la ma-kawiningu, hi dakuki-ha mbuu ndàba da pawunda-nggu, ba dahimbu rehi ma peku pa-pameti-ka.

⁸Pekuda ihu pamara rukuna na akatu-da? Pa-tàlaru-hawa la hàngga-munja, ou Ala!

⁹Udihaha da lodu njadangu-nggu, dàngu upinja danguda da wai matanggu; ka ndau pangàda-anja nuda?

¹⁰La lodu wara-nggunggau Nyumu, panyara-ha da muhunggu hi da-kandulingu, ba kupi hàmu-manya naangu-nangga i Ala.

¹¹Kuwotu-nya i MIRI Ala, rukuna na panjanji-nangga.

¹²Nyunama pamonu-nggu, nda ku-mangàdatu-a, nda jia nggiki-anangga tau.

¹³Napa ku-pahàra-nja da panjanji-nggunggau, ou Ala, dàngu hi kuwotu kameti maraku pamalangungu lai Nyumu.

¹⁴Bau pahàla-duka welingu la meti, dàngu bau manggangga ka àmbu kunjoru. Hi peku luringgu la opangu-na i Ala, la harii ma-hambila-nya mbutana na maluri.