Read Kambera PAMALANGUNGU 59 Bible Online

PAMALANGUNGU 59 - Kambera bible

PAMALANGUNGU 59

¹Nduma ma-kapipi tau maludu. Pa-namatungu la wiliku: Àmbu pamolungu. Pamalangungu-na i Ndautu, ba na-paràhangu tau i Haulu pa-hamata-ya na umana i Ndautu ka-pameti-ya.

²Ou Alanggu, pamara-ka welingu la muhunggu-ka, hanggubu-ngga welingu la tau ma-hànjalu-ka.

³Pahàla-ka welingu la tau mawunda akatu, pamara-ka welingu lai nyuda da ma-pameti tau.

⁴Tàngaru, da-pandapungu pa-pameti-ka, da tau mbana eti da-pambulungu pa-janggilu-ka; làti ba nda kuwunda-a manjala jàka ndia la papangga lii palara, ou MIRI.

⁵Jiapa ka nda kunjala, da-ngaingatungu dàngu hi da-ehingu.

⁶Kidiwa dàngu ndula-kawa, ou Ala Hupu Majangga. Ou Ala Ihirailu, hakahii wiki-nyawa. Kidiwa dàngu huku-njawa da banjaru, àmbu aïha da tau akatu ma-katadaku.

⁷La kalitu dabeli, ba dàngu kangàriku-da hama tuna ahu da-winggiru-nya na paraingu.

⁸Nutakungu-madanya pa-paakangu dàngu pa-pawawa-ka; da kareuku-da dadàka hama hapanda, dakaka-ya la eti ba nda ningua marongu-ha.

⁹Tàka Nyumu urikinja nyuda, ou MIRI, mbutana na banjaru upaaka-nja.

¹⁰Nyumu jiakau àtalu-nggu, kumonu-nggau Nyumu, ba Nyumudu ngia pa-hinggilu-nggu ou Ala.

¹¹Ruku mbuha-nangga na Alanggu namai tomaka, na-pahia-ngga paita-ha ba pakàku-ha da muhunggu.

¹²Àmbu pameti-duha ou MIRI, ka àmbu na-maromba-nja banjaru-nggu. Pai - iha-njawa dàngu pakàku-hawa wàngu kawaha-mu, ou MIRI, ma-katindi-kama.

¹³Ba danjala wàngu kareuku-da; màta kahiru-ha la ngànjangu-da, ba da mbuhangu pa-ràtungu dàngu pa-kambàliku.

¹⁴Patàlaru-ha la hàngga-munja, ou Ala, patàlaru-ha ka lundu dambuta. Hi napi-ndàbanya tau, ba i Ala ma-pareta-ya na Ihirailu, dàngu na pareta-na na-làmbatu la nggubulu pinu tana.

¹⁵La kalitu dabeli, hama tuna ahu ma-kangàriku, hi da-winggirungu paraingu.

¹⁶Da-wenangu pahimbu pangangu, dàngu hi dauulu jàka nda dambihu.

¹⁷Tàka nyungga duku kuludu-nya na àtalu-mu; nimbihu mbaru kuludu pa-hanggubungu nggoru rukuna na pa-namungu-mu. Ba Nyumudu ngia pa-hinggilu-nggu, ngia pa-handera-nggu la rehi handuka.

¹⁸Ou Ala, na àtalu-nggu duku, kuludu-nggau ludu wotungu, ba Nyumudu ngia pa-handera-nggu. Ou Ala mbuhanggu duku.