Read Kambera PAMALANGUNGU 62 Bible Online

PAMALANGUNGU 62 - Kambera bible

PAMALANGUNGU 62

¹Nduma ma-kapipi tau maludu. Pa-namatungu la wiliku-na i Yendutungu. Pamalangungu-na i Ndautu.

²Wàngu mandangu-na na ndewanggu nanedi-nya i Ala, welingu lai Nyuna-a na mànangu-nggu.

³Nyuna-a ma-hanggubu-ngga dàngu ma-pamàna-ngga, Nyuna ma-kahiri-ka, nda jia tanggihiru-anggu.

⁴Lundu pirangu-mapa bai wàngu etimi pa-hànjalu tau na maberi pindingu kahuru-ya dàngu beri kilimbatu ma-tanyungguru-ya?

⁵Nyimi wuku-minya papuha-ya nyunama-a welingu la ngia pa-mandapu-na na majangga. Wai leji-maminya la pa-kambàliku; ipa-nàrungu wàngu ngarumi, tàka la etimi iràtungu.

⁶Wàngu mandangu-na na ndewanggu nanedi-nya i Ala, welina lai Nyuna-a na mànangu-nggu.

⁷Nyuna-a ma-hanggubu-ngga dàngu ma-pamàna-ngga; Nyuna-a ma-kahiri-ka nda jia tanggihiru-anggu.

⁸Nyuna Alaya mawua-ngga mànangu dàngu tembi, Nyuna na ma-hanggubu-ngga dàngu na ma-kahiri-ka, na-kapingatu.

⁹Ha banjaru-nggu monu mànu-nyawa i Ala; ràbaya na ihi etimu lai Nyuna, ba jiaya Nyuna na ngia pa-handera-nda.

¹⁰Na tau hama tuna handàka kayeku-aya, tau matua anakeda hama nda pa-wilingu-da. Jàka timba-nja da halela, darihi halela welingu la handàka kayeku.

¹¹Àmbu monunya na pangala-mu bau lamuji angumu, dàngu àmbu hamela wàngu malanja pa-rambangu. Jiapa ka da-bonjangu da pawulu-mu, àmbu na-karitaku ningudu lai nu na etimu.

¹²Nda wàngu pa-handàkangu bia ba kurongu-ya na panii i Ala na kodi màka ba welina lai Nyuna,

¹³dàngu ba na-padaingu na pa-namungu-na. Nyumu, ou MIRI, upalimba-nya mbutana na tau tundunya na pawunda-na.