Read Kambera PAMALANGUNGU 65 Bible Online

PAMALANGUNGU 65 - Kambera bible

PAMALANGUNGU 65

¹Nduma ma-kapipi tau maludu. Pamalangungu-na i Ndautu. Na ludu.

²Ràka-mana ba mawotu-nggau la Hiungu, ou Ala, dàngu ba ma-pahàra-nja da panjanji-manggau Nyumu.

³Ba Nyumudu ma-tanaü hamayangu; lai Nyumu namai ndàba na tau ruku ba mbàda njalana.

⁴Da njalanggu lalu mbotu-mada lai nyungga, tàka mbuu ndàbada mbàda jàma-munjaka.

⁵Oha-naka na tau papindi-mu, hiu paaunya pa-ngiangu la Umamu. Napa pa-pahoda-kama wàngu mbuu ndàba mahàmu la Umamu, la pangia matua-mu.

⁶Uhema-kama bau wua-nggama talu, uwunda pa-hangàtarungu ka pahàla-kama nyuma! Nyumu jiakau pamonu-da da banjaru lundu la tehiku mamarau.

⁷Wàngu kodi màkamu, upamàndu-nja da palindi, ka pajiliku-nya na kawaha kaborangu-mu.

⁸Na kawoku tehiku dàngu na tunguna na-ngalingu upawadaru-ya, na kanyaüru-da da banjaru mu-pakahàna-ya.

⁹Mbuu ndàba na ma-mandapu-nya na tana da-mangàdatu dàngu datembi-kau ba daita-ha da pawunda-mu da ma-wirungu. Upawiti-nya ka na-paoingu paraï pambaha eti nggubulu-na na tana welingu la hupuna lundu la hupu hauna.

¹⁰Ukulipu-ya na tana hiu wuanya urangu, upakamboka-ya hi nabundu làndangu na ihina. Da luku upinuha wai, upayema-nja uhu nggàndumu nyuda, langatàka tuna numaka bau payema-nja.

¹¹Da manggawa kabànda-na uparindi-nja wai tàka hiu pahini wànja wai da kabànda tanana. Wàngu urangu bau kangaburu-ya na tana, hi monu hàmunja ba da-kamboka da ngara matumbu.

¹²Ruku hàmumu upayemangu ihi woka nimbihu ndaungu; la ngia pamaimu, lai nu nabundu làndangu.

¹³Da maràda telangu dambinu-nja mbimbi kamàmbi, da palindi da-hawola ndàba.

¹⁴Da maràda da-lumburu-nja mbimbi, da lolangu dambinu-nja uhu nggàndumu. Mbutada da-paoingu paraï pambaha eti hi daludu hawola.