Read Kambera PAMALANGUNGU 66 Bible Online

PAMALANGUNGU 66 - Kambera bible

PAMALANGUNGU 66

¹Nduma ma-kapipi tau maludu. Ludu pamalangungu. Miwara mi-kayaka-wa ndumana i Ala, ha nggubulu tana!

²Luduwa dàngu pa-bokulu-ya na tamuna, pa-mangara-nya wàngu wo - wotu-minya.

³Paniinya i Ala, “Langatàka pa-hangàtarungu-ha da pawunda-mu! Na muhu da-karuduku-nggau ba dira mangàdatu-ha, ba lalu bokulu-ya na mbihamu.

⁴Nggubulu na tana da-karuduku pa-marubuku-nggau, daludu wotunya na tamumu,” wàminya.

⁵Maiwa kai tàngaru-ha da paràma-na i Ala, langatàka pa-hangàtarungu-ha da pawunda-na la tau!

⁶Na tehiku na-pambeli-ya mamàdu, da boku la mangilu-ma da lii la wihi ba dapala-ya. Jia-duya hi ma-hanggela hawola ruku da pawunda-na.

⁷Na-pareta wàngu kodi màkana lundu nu - nu. Da banjaru na-hamata-ha, ka àmbu da-pawula da mawunda kanyaüru.

⁸Wotu-nyawa na Alama, ha banjaru-ka, waranya na wotungu-mi lai Nyuna!

⁹Nyuna namangga-nggama ka pa-daingu lurima, dàngu nda namàta-nggama panjoru.

¹⁰Ou Ala, Nyumu makaka-kama hama tuna ba hiri àmahu bara la epi.

¹¹Umàta-nggama pa-hanjubulu la lambongu kahili, tàka hiu wua-nggama ngàndi ma-kanjupu mbotu.

¹²Umàta-nggama ka nataro - rohaku-kama muhu; mapala ningu la iwa dàngu la epi. Tàka nàhu ukaria-nggama la pangia ma-mànjaku lurina.

¹³Napa ku-hurungu pawotu kameti maraku patunu la Umamu dàngu pa-pahàrangu njanjinggu lai Nyumu,

¹⁴da njanji da papeka-nggu ba ningga la handuka.

¹⁵Ka-kuwotu kameti maraku patunu lai Nyumu wàngguka welingu la banda papindi, kamàmbi mbimbi dàngu hapi mini, na kutuna na-kahuluku la awangu.

¹⁶Maiwa dàngu patingingu-wa, ha dimi mbutami tau karadaku, ka ku-kaloka-ya na pawunda-nangga i Ala, wàngguka.

¹⁷Mbàda wara-ngguka pakarai pa-ndulangu lai Nyuna; nàhu kuludu wotunya Nyuna.

¹⁸Jàka ku-mbuhangu làti pawuku-ya na akatu la etinggu, jiangu-ma ba nda na-mbuhangu patingi-ka i MIRI.

¹⁹Tàka i Ala mbàda rongu-nanggaka, naeti wànya na kamahingu-nggu.

²⁰Kuwotu-nya i Ala ba nda na-tebuku-ya na hamayangu-nggu, dàngu ba naingu mbuha-nangga.