Read Kambera PAMALANGUNGU 68 Bible Online

PAMALANGUNGU 68 - Kambera bible

PAMALANGUNGU 68

¹Nduma ma-kapipi tau maludu. Pamalangungu-na i Ndautu.

²I Ala na-hadangu pa-tanyala-nya na muhuna, na tau ma-karaü-nya eti Nyuna napalai welingu la hanggana.

³I Ala nanyara-ha nyuda hi da-yilangu, hama tuna na kawuu pahapui ba da-mbulangu. Hama tuna lilingu malui la epi, tuna numbu ba na-munangu na tau akatu welingu la hanggana i Ala.

⁴Tàka da tau manundu da-hanggela da-hawola, dapaoi - oingu paraï pa-hawola la hanggana i Ala.

⁵Ludu wotu-nyawa i Ala, haila-nyawa na tamuna, palànyapu-nyawa ànda ndumana Nyuna na ma-karetangu karumangu. MIRI-ya na tamuna — hanggela hawola-wa la hanggana!

⁶I Ala na ma-ngiangu la pangia matua-na ama ana mamila dàngu ma-kahiri kawini meti leiya.

⁷I Ala nawua-nya ngia pa-ngiangu na tau ndora meha; da tau pa-tanawangu na-pahàla-ha hi da-paohangu. Tàka da tau ma-patarangu lai MIRI lupangu da-ndàdiku la tana kariku.

⁸Ou Ala, bau karia-nya na banjaru-mu palii ningu la maràda màdu,

⁹na-yoyangu na tana, na urangu na awangu la hanggamu Nyumu, ruku maina na Ala Hinai,[32] na Ala Ihirailu.

¹⁰Wàngu làndangu bau pa-purungu urangu, na tanamu na ma-marokutu upajia beliya.

¹¹Hi na-ngiangu na banjaru-mu lai nu; la hàmumu, ou Ala, na tau mila ukabubulu-ya.

¹²I MIRI na-wuangu pareta, hi dangàndi lii langu da kawini:

¹³“Da maràmba dàngu da pambada dapalai-ka!” wàda. Hama kulundiha ma-hawurungu ba da-yilangu. Da kawini la uma dapabe - beringu, àmahu bara àmahu rara papalai wàrungu. Jiapa ka nadangu na manda lua la pabera, na banjaru-na i Ala natalu.

¹⁵Ba na-patanyala-nja lai nu da hanganji paraïna Mahupu Mbiha, puru-nanyaka na ura kamba welingu la Palindi Hàlamungu.

¹⁶Na Palindi Mbahàngu kanjupu mànda ningu hamangu-ya, palindi madangu pinu-nanya.

¹⁷Ka nggikina welingu la pinumu da madangu hiu ilu pakilitu-nya na Palindi Hiungu[33] na papindi-na i Ala patuya ngia pa-ngiangu-na? I MIRI napa na-ngiangu lai nu lundu nu - nu.

¹⁸Wàngu riu rata kareta ma-kapingatu namai la njongada i Ala ba wàngu bunjuku-na.

¹⁹I MIRI nahei la pangia majangga; dangu tanawangu pa-dundilu-na. Nakei maraku welingu la tau pinu tana dàngumbu welingu la banjaru ma-patula ngganggangu; ka angu ngiangu-da i MIRI Ala.

²⁰Wotunya i MIRI, ba Nyunadu i Ala na ma-pamàna-nda; nimbihu lodu na dukuha da ngàndinda.

²¹Na Alanda jiaya na MIRI ma-pamànangu, Nyuna na-pamara-ta welingu la meti.

²²I Ala jiangu-ma na-pamuburu-ha da katiku muhuna, da katiku-da nu da tau ma-paengangu la njala.

²³I MIRI napanii, “Ha dimi banjaru-nggu, kukaria-nja da muhumi welingu la Mbahàngu kukaria belinja welingu la lata kuru nduu,

²⁴Kai baha wihimi wàngu wai riada, dàngu ka dajàli-ha ahumi lundu dirada,” wàna.

²⁵Mbuu ndàbana naita-ya na païmu bau talu, ou Ala, na Alanggu, na Hanganji-nggu papaï kariangu-ya hanggangu la ngia pa-ngiangu-na.

²⁶La ngora nàhunja da maludu, la malamiri da majungga; la padua da anakaria ma-tundungu lamba ha-kapapa; na lududa tuna nu:

²⁷“Wotunya i Ala la kabungguru banjaru-na, wotunya i MIRI ha ana umbuku-na i Yakupu mbutami!” wàda.

²⁸Na Mbanyamingu na kabihu ma-maeri hupu, nàhunya la ngora, pa-ndutungu da ngora Yahunda ma-kanjupu danguha la ndàkida nyuda nàhunja da ngora Hembulungu dàngu Nàputali.

²⁹Na Alamu na-karuhi-ya na àtalu-mu; ou Ala, paundu-nyawa na pambàda wundamu ndumama nyuma.

³⁰Da hanganji dangàndi hunggu maraku lai Nyumu la Umamu la Yeruhali.

³¹Kabàla-ya na Mehiru, na banda bohu la wuku tibu hala. Hàngganja da banjaru, na kabàba hapi mbàtingu dàngu anada, da ma-maràngga pa-tarohaku la pa-ngalangu àmahu bara. I Ala na-paiha nggangganja da banjaru ma-mbuhangu pa-pabera.

³²Da ma-pangora la Mehiru damai ba dangàndi wudu; da tau Hundangu ri - ringada pangàndi hilu katiku lai Ala.

³³Luduwa ndumana i Ala, ha mbutami ngara pareta-ka, ludunya ludu wotungu ndumana i MIRI,

³⁴ndumana Nyuna mangeni-nya na ma-kahàna, na maninya welingu la handàka-na. Patingingu! Panii-nanya i MIRI: na talia liina nda - ndàrana ba kanjupu mbangatu-ya.

³⁵Pajia-yawa na kawaha-na i Ala na ma-bunjuku la Ihirailu, na kawaha-na natàka la awangu.

³⁶Kanjupu pa-maratangungu-ya na Alanda ba naluhu welingu la ngia pa-ngiangu-na. Na Ala Ihirailu nawua-nya na banjaru-na àtalu dàngu kodi màka. Pawotungu-maya i Ala!