Read Kambera PAMALANGUNGU 71 Bible Online

PAMALANGUNGU 71 - Kambera bible

PAMALANGUNGU 71

¹Lai Nyumu ku-handera, ou MIRI, àmbu màtangga ka pamakia-ka.

²Pahàla-kawa bau moladu, tanaü-ka dàngu pamara-ka.

³Màtawa ka beri tundula watukau ngia pangudu-nggu, ngia parengga tàka mànunggu. Bau bota-duyaka la pa-pamàna-ngga, Nyumu jiakau ngia pa-handera-nggu dàngu ngia paini-nggu.

⁴Ou Alanggu, pamara-ka welingu la tau akatu, welingu la kawaha tau mbana eti dàngu tau haroputu.

⁵Ba Nyumudu pamonu-nggu, ou MIRI, MIRI, kuwaikau piti welingu ba bidi tauka.

⁶La ngala luringgu ku-haria lai Nyumu; Nyumu maopa-ngga[34] piti welingu ba kudedi jiaya hi kuwotu mànunggau.

⁷Na luringgu nanjadi ngerangu la tau dangu, ba Nyumu ngia pa-handera-nggu ma-kapingatu.

⁸Ku-panua likungu la pawotu-nggau Nyumu, malo - lodungu ba ku-bobaru-ya na bokulu-mu.

⁹Àmbu wàrungga la rehi kaweda-nggu àmbu dunjaku-ngga ba nanjàpu-ka na àtalu-nggu,

¹⁰nadu da muhunggu da bataya na rukunggu nyungga, da tau ma-mbuhangu pa-pameti-ka da-paangungu.

¹¹Dapanii, “Mbàda dunjaku-nanyaka paraïna i Ala; màla ka tayaulu-ya ka tayàpa-ya, ba nda ningua ma-pamara-ya,” wàdangga.

¹²Àmbu marau-ngga, ou Ala, dou na Alanggu, lu ndula parengga-ngga.

¹³Màtawa na tau ma-hànjalu-ka ka pa-makia-ya dàngu ka pa-tàlaru-ya. Màtawa na ma-mbuhangu pa-hanggàmaru-ka ka nambingu dàngu ka pawawa-ya.

¹⁴Tàka nyungga duku kumonu mànunggau Nyumu, dàngu hi hama huka wotunggu-nggamu.

¹⁵Malo - lodungu kupeka-ha da pawunda-mu da mamola, dàngu na mànangu ma-welingu lai Nyumu, da panda taü.

¹⁶Kuwotu-nja da pawunda ruku talumu, ou MIRI Ala, ku-bobaru-ya na molamu, na molamu Nyumu-a.

¹⁷Welingu ba bidi tauka bau papeka-ngga, ou Ala, lundu nàhu kupeka-ya na paràma-mu na pa-hangàtarungu.

¹⁸Ou Ala, àmbu dunjaka-dungga, lundu kaweda-nggu ba ku-uwangu-ka, ka peku bobaru-nggunya na kodi màkamu dàngu na kaborangu-mu la mbuu ndàba ana umbuku ma-malamiri.

¹⁹Na molamu, ou Ala, hama jangga awangu-ya; ma-bokulu-maha da pawunda-mu; nggamu mahama-nggau?

²⁰Mbàda pabuku-munggaka mayila dira matiki, tàka napa na àtalu-nggu upajia beliya hiu pahada-ngga welingu la reti.

²¹Uwundangga parihi tembi wànangga tau, hiu hili ombaka.

²²Ka kuwotu-nggau Nyumu wàngu lamba ha-kapapa wàngguka, bau tuturu-du, ou Alanggu. Ka kuwotu-nggau wàngu jungga wàngguka, ou Ala ma-matua la Ihirailu.

²³Ku-paoingu ba dira mbàha etika, ba dàngu ludu-nggunggau ludu wotungu. Na tolu na hamangu-nggu daludu mbaha eti, ba mbàda pahàla-munggaka.

²⁴Malo - lodungu napa ku-bobaru-ya na molamu, ba mbàda pakàku dàngu pa-makia-muhaka da tau da ma-mbuhangu pa-pahanggàmaru-ka.