Read Kambera PAMALANGUNGU 72 Bible Online

PAMALANGUNGU 72 - Kambera bible

PAMALANGUNGU 72

¹Welingu lai Halomu. Ou Ala, papeka-nya na Ukumu la hanganji, wuangu-ya na molamu la anana na hanganji.

²Màla àruki ka na-patanda-nya ngera na banjaru-mu nunjuya na Ukumu, dàngu ka na-panuda-nya mamola na tau pa-kapidihu.

³Màla àruki ka ninya na yuru yela dàngu na peku hàmu la paraingu-ma, dàngu ka ninya na mola nduma banjaru nggubulu-na.

⁴Màla àruki na hanganji ka napulu angunya na rayatu mangia wawa, ka nandula tau mila dàngu ka na-pamolu-nja da ma-kapidihu-ha.

⁵Màla àruki ka na-torungu lundu ana umbuku la ngala ba ningupa mata lodu dàngu wulangu.

⁶Màla àruki na hanganji ka beri urangu mapuru la maràda-ya, beri ura kawalu mahini-ha da woka.

⁷Màla àruki ka na-bonjangu na mola la ngala lurina, dàngu ka na-làndangu na yuru yela la ngala ninyapa na wulangu.

⁸Na parukangu pa-lerangu napa na pareta-na piti welingu la tehiku hau lundu la tehiku hau, na-tayilingu piti welingu la pahunga lundu la patama.

⁹Da banjaru la maràda telangu napa da karuduku lai nyuna dàngu da muhu da-marubuku la wihina.

¹⁰Da hanganji Tàrihu[35] dàngu da nuha napa dangàndi maraku lai nyuna. Da hanganji Arapu dàngu Etiopia damai ngàndi hilu katiku.

¹¹Mbuu ndàba da hanganji napa da-marubuku la hanggana, mbuu ndàba na banjaru napa natuha atana.

¹²Ba nandula tau pa-kapidihu na manda pa-yatangu, dàngu tau mila mawara lai nyuna.

¹³Nanamu-ya na tau mila dàngu na rayatu mangia wawa, dàngu na-pahàmu-ya na luri tau manda ningungu.

¹⁴Na-pahàla-ha welingu la ma-pakapidihu dàngu ma-pajanggilu, nadu na lurida ba na-pawilingu la hanggana.

¹⁵Màla àruki ka namalai lurina i tamu umbu hanganji! Màla àruki ka maraku wànya àmahu rara welingu la Arapu. Màla àruki ka hamaya mànunya tungguna dàngu ka pakanyuru mànunya.

¹⁶Màla àruki ka da bundungu da uhu nggàndumu la paraingu nggubulu-na, dàngu dambinu-nja ihi woka da palindi-na. Màla àruki ka na-mamboka na tanana hama tuna na Palindi Limbanongu, dàngu na ihi paraingu ka na-bonjangu hama rumba la maràda-ya.

¹⁷Màla àruki ka nua naingu-na ba pangàda-nya na tamuna na hanganji, na hamboka-na ka na-bonjangu la ngala ninyapa na mata lodu. Màla àruki da banjaru dakarai-ya ka pakanyuru-ha hama tuna nyuna, dàngu mbuu ndàba na tau, oha-anaka wàdanya.

¹⁸Pa-wotungu-ya i MIRI, Ala Ihirailu! Ba Nyuna-a na matuu pawunda pa-hangàtarungu.

¹⁹Pa-wotungu-ya na tamu bokulu-na Nyuna lundu nu - nu; màla àruki na nggubulu pinu tana ka nambinu-nya mangarangu-na! Màtawa nuda ka da-hàrangu. Amingu!

²⁰Tuna nuka da hamayangu-na i Ndautu, anana i Ihai.