Read Kambera PAMALANGUNGU 73 Bible Online

PAMALANGUNGU 73 - Kambera bible

PAMALANGUNGU 73

¹Pamalangungu-na i Ahawàpu. Langatàka kanjupu hàmuya i Ala la banjaru-na, la tau da ma-yahangu etida.

²Tàka nyungga kundua ndandika, natika pa-mbulangu-ka-àmangu na pawainggu,

³ba ku-kapihi-nya na tau ma-abungu, ba kuita-ya na-paura-na na tau akatu.

⁴Nyuda nda ana hidu-mada, na ihida daparii pa-kalotu da-halimu hayàla.

⁵Nda dapi-anya na handuka, nda nanggàna-aha ura dedi hama tuna na tau hawiangu.

⁶Tuna nu duka hi da-ngànjangu, dàngu hi da-kukutungu mànu wàngu rara matada.

⁷Welingu la etida na-lembaru na akatu;[36] la kanandingu-da nutakungu-madanya pa-unangu ma-akatu.

⁸Da-paakangu dàngu datola pa-irakungu, dàngu ngànjangu-da da-pangàdungu pa-kapidihu.

⁹Da lapiya i Ala la awangu, dàngu hi dapanii abungu la ta - tau la pinu tana,

¹⁰hi lupa na-pambelingu na banjaru-na i Ala lai nyuda,[37] dàngu hi dawaiya na kareuku da nyuda.

¹¹Dapanii, “Nda jia pi-ananya paraïna i Ala, nda jia jàngapu-ananya paraïna i Hupu Majangga,” wàda.

¹²Tuna nu duka na ngera tau akatu; na lurida na-mandangu, dàngu naingu bonjangu-da da pawulu-da.

¹³Kahewa-ma-ana ba ku-pananjarungu ka daingu yahangu-na na etingu; nda ningua linguna ba ku-wiliru-nya na njala.

¹⁴Nadu malo - lodungu nanggàna-ka ura dedi; nimbihu mbaru ba pa-mayila-ka.

¹⁵Làti jàka kareuku tunggu nu, kabai-nggunya na ndalaru da anamu.

¹⁶Ku-pamukarungu keha ka kupinya jàka wànggu, tàka lalu kalutu-ya la pa-jàngapu-ya.

¹⁷La malamiri, tamanggu-nyaka la Umana i MIRI, ka pi-nggunyaka na hupu njàpu tau akatu.

¹⁸Ubànjalu-ha la pangia ma-taràhiku, umàta-nja panjoru hi da-tàlaru.

¹⁹Da-làjaru la ha-kambàdiku mata, kanjupu wirungu-ya na hupu njàpuda.

²⁰Hama tuna manggadipangu ma-maromba la rehi mbaru; tàka bau hadangu-ka, ou MIRI, molungu-ma-adanya.

²¹Ba ningga la hidu eti dàngu ba hama tuna pahàka-ya na etinggu,

²²kunduba nda ku-jàngapu-ya, hama tuna bandaka la hanggamu Nyumu.

²³Ba tuna daingu-manggu la lihimu, uyàpaya na lima kawana-nggu.

²⁴Ukapipi wàngga lii panaungu, napa ngeru uyemaka wàngu tembi.

²⁵Nggamuya na mangunggu la awangu, hinggilu-mu Nyumu? Hinggilu-mu Nyumu nda nggàra-a pambuha-nggu la pinu tana.

²⁶Ka jiapa na-lamanga na tolunggu dàngu na ndewanggu, Nyumu jiakau àtalu-nggu, ou Ala; Nyumu jiakau-ka mbuu ndàbada da pamangu-nggu wànggu lundu nu - nu.

²⁷Na tau na ma-dunjaku-nggau napa na-manjurangu, upatàlaru-ya na tau manda tuturu lai Nyumu.

²⁸Tàka nyungga duku, kanjupu hàmuya ba ningga la lihina i Ala, i MIRI Ala kutuya ngia pa-handera-nggu, ka peku bobaru-nggunja da pawunda-na.