Read Kambera PAMALANGUNGU 74 Bible Online

PAMALANGUNGU 74 - Kambera bible

PAMALANGUNGU 74

¹Ludu lii panaungu-na i Ahawàpu. Ou Ala, lundu nu - nu-maka na-dunjaku-munggama? Ka nggikina hi pa-daingu hàngga-munya na banjaru wikimu?

²Pangàda-nya na banjaru pa-pindimu weli ndaingu, na banjaru pa-pamarandeka-mu ka banjaru-munya. Pangàda-nya na Palindi Hiungu, na patumu ngia pa-ngiangu-mu.

³Njadanya na pangia ma-tanyungguru; mbuu ndàba da maninja la Umamu na-palàjaru-haka muhu.

⁴Da muhumu dakaya - yànggaku la Umamu, hi da-kadinjikungu penji tanda talu lai nu.

⁵Nyuda hama tuna tukangu tau mapunggu ai wàngu kataka, da ma-walihungu kataka-da ba dapunggu ai lai omangu.

⁶Da-palàjaru ndàbaha da ai pa-huratu wàngu kataka dàngu tukulu.

⁷Datunu pakehi-ya na Umamu; da-pairaku-ya na ngia pa-marubuku-nggau Nyumu.

⁸Da-roduku halawàla-nggama nyuma, dàngu datunu pakehi-ha mbuu ndàba da ngia pa-lumungu la paraingu yiana.

⁹Da wunangu dàngu da tanda pa-hangàtarungu nda pa-itangu-apa, nda haàtu-a mapinya jàka pirangu-mapa ba tuna yia.

¹⁰Lundu pirangu-mapa, ou Ala, ba na-paaka-nggau muhu? Lundu numaka, na-pawawa-danya na tamumu?

¹¹Ka nggikina hi ndau tula-nggama?[38] Ka nggikina hiu puli-nggama?

¹²Welingu la kawunga-manaka ba jiakau hanganji-nggu, ou Ala, Nyumu-maka ma-pamara-kama nyuma.

¹³Wàngu àtalu ma-wirungu bau bika tehiku, dàngu bau beraha da katiku nggarihu la tehiku.

¹⁴Upamuburu-ha da katiku Lewiatangu hiu tuha pangaa banda bohu la maràda telangu.

¹⁵Nyumu ma-pawiti-nja hi da lulungu da matawai dàngu da luku; da luku bokulu mu-pamihi-ha.

¹⁶Nyumu mawulu-ya na lodu dàngu na rudungu, matunya pangia-na na mata lodu dàngu na wulangu.

¹⁷Da padira-na na pinu tana Nyumu ma-kawuku-ha, uwuluya na ndau wandu dàngu na ndau urangu.

¹⁸Ngàdaya nggiki hama pawawa-nanggau muhu, ou MIRI, na banjaru manda tandakau Nyumu nalapi-ya na tamumu.

¹⁹Àmbu pulinya na banjaru-mu na manda payatangu la lima muhu mambana etina. Àmbu lundu nu - nu na maromba-munya na ura dedina na banjaru-mu na makàba ndewana.

²⁰Ngàdaya na njanji patura-mu lai nyuma, nadu la pangia ma-kapàtangu na-pajanggilu ningu na tau la paraingu yiana.

²¹Àmbu màtanya pa-makia na tau pa-kapidihu, màla àruki ka dawotu-nya na tamumu paraï tau mayila dàngu tau mamila.

²²Kidiwa ou Ala, ndolaku-nya na palakara-mu Nyumu! Nadu ba malo - lodungu da-paaka-nggau paraï tau manda waikau Nyumu.

²³Àmbu mbulanya na warada da muhumu, na-kanyaüru-da da papamu da ma-parukangu pa-kabàtingu!