Read Kambera PAMALANGUNGU 78 Bible Online

PAMALANGUNGU 78 - Kambera bible

PAMALANGUNGU 78

¹Na ludu lii papekangu-na i Ahawàpu. Tingiya na lii papekangu-nggu, dou na banjaru-nggu, tanaü-ha da kareuku-nggu.

²Napa kutiki lawiti dàngu lii pangerangu, da dekangu la handàka-na napa ku-kaloka-ha,

³da matumbu da parongu-ma dàngu da payema-ma, da papanii-da da kawunga bokuma.

⁴Nda ma-pahini-anya la a - anama; tàka ka bobaru-ya la ana handalaru ma-pandutungu, wàma rukuna na kodi màkana i MIRI dàngu da paràma-na da ma-bokulu, dàngu da pawunda-na da pa-hangàtarungu.

⁵La banjaru Ihirailu na-wuangu-ya na Ukuna, dàngu na hupu liina la wàlana i Yakupu. Na paràha-nja da bokunda la mangilu pa-papeka wànja da anada,

⁶ka datanda-ya Nyuna paraï ana handalaru ma-pandàkingu, hi da-pangala-nya la anada nyuda.

⁷Ba tuna nu nyudambu da-pahangga-nya na monungu-da lai Ala, nda da-maromba-nja da pawunda-na, tàka da-pamàndu-nya na hupu liina,

⁸ka àmbu dahama-nja da bokuda la mangilu da makàli kawutaru dàngu katadaku; nu da ana handalaru makàli tayonggahu pawaida, dàngu nda da-manundu lai Ala.

⁹Na kabihu Epuraïmu na mambeni wàngu pana dàngu tandai pana, napalai la rehi pa-hànjalangu.

¹⁰Dapangga-ya na pa-njanjingu-na i Ala lai nyuda, dàngu nda da-mbuhangu panunju-ya na Ukuna.

¹¹Da maromba-nja da pawunda-na, dàngu da pa-hangàtarungu pa-paloha-na lai nyuda.

¹²La hangga bokuda la mangilu, i Ala nawunda pa-hangàtarungu la tana Mehiru la ma-ndidaru Huangu.

¹³Nabika-ya na tehiku hi na-papala-nja nyuda; hama tuna kahiri-ya na wai, ba na-dimbaku-ya.

¹⁴La lodu na londaha wàngu karumangu la rudungu wàngu epi ma-hambila.

¹⁵Nabika-ha da palindi watu la maràda telangu, nawua-nja pa-ngunungu mabundu làndangu.

¹⁶Na-paràha-nya na tandula watu pa-paluhungu wai, hi hama lukuya ba na-lulungu na wai.

¹⁷Tàka nyuda pa-daingu-madanya panjala lai Ala, la maràda telangu da-kawutaru hangganya i Hupu Majangga.

¹⁸Da-harawuku pakama-nya i Ala, ba da-karuhi pangangu pambuha-da.

¹⁹Da-ndubaku-ya i Ala ba dapanii, “Yia la maràda telangu namàka ihu pawua-nda pangangu i Ala?

²⁰Deningu-na ba napalu palindi watu ma-kalatungu, hi na-mbangatu na wai ba na-lulungu. Tàka namàka ihu pa-paloku-nya roti dàngu pawua-nya tolungu na banjaru-na?” wàda.

²¹Ba narongu-ya nuna i Ala, na-karoruku wànya epi na banjaru-na; na-hàngga-nanja nyuda hama hukana,

²²ba nda dapawai lai Ala, la kodi màkana na ma-ngalangu pa-pamara-ha.

²³Jiapa-kai ba tuna na-paràha-nya na awangu pa-bunggahu-ha da katonga-na.

²⁴Na-papurungu uhu nggàndumu welingu la awangu, nu na màna[41] ka dangangu.

²⁵Nawua-nja pangangu mabundu làndangu; dangangu roti maranongu.

²⁶Na-paràha-mbunya pa-hapuputu na ngilu timiru; ruku kodi màkana na-hadumbalu na ngilu weli lurungu.

²⁷Nduma banjaru-na na-papurungu ma-hawurungu, hama waraha ba nda pataü-ha danguda.

²⁸Nu da ma-hawurungu napuha-ha la ma-pauma terangu la winggiru ngia pa-ngiangu-da.

²⁹Hi dangangu lundu mbihuda, ba mbàda wua-nanja parinju-da paraïna i Ala.

³⁰Tàka ndedi nali-aya na mangàba-da; hi lupa ba talànga nganguda,

³¹na-hawuwatu na hànggana i Ala hi na-ndubaku-ha; da bidi tau dàngu da ma-kaborangu la Ihirailu na-pameti-ha.

³²Jiapa-kai ba tuna, na banjaru-na pa-daingu-madanya panjala, da pawunda-na da pa-hangàtarungu nda da-hàrangu-wa-anya la papawai.

³³Tuna nu duka hi na-kanjupu-ya na lurida paraïna i Ala, hama tuna kayeku, mangàdatu jua-ma-aya la ngala lurida.

³⁴Handàka ningu - handàka ningu pa-pameti-na i Ala la hongada, hawiangu dapeka halaera dàngu hi da-pambelingu lai Nyuna.

³⁵Danamu-ya ba i Ala maopa-nja nyuda, dàngu bai Hupu Majangga ma-pamàna-nja nyuda.

³⁶Tàka nyuda da-kakòlulu lai Nyuna, da patiki-da ma-kambàliku jua-maha.

³⁷Nda da-manundu lai Nyuna dàngu nda da-pamàndu-nya na njanjina.

³⁸Tàka i Ala nanamu dàngu najàma-nja da njala banjaru-na, hi nda na-patàlaru-ha. Nda na-pambirangu bia pa-roputu-ya na karaü etina, hi nda na-hanubuku-nya na hànggana.

³⁹Nanandi-nya ba ruku lima-nanja manda payatangu-ha, hama tuna ngilu mali hàmbu manda hili beliha.

⁴⁰Kanjupu pa-nutakungu-ha pa-kawutaru lai Nyuna, hi dahàka etiya Nyuna ba la maràda telangu-ha.

⁴¹Dakama hili weli - hili welinya i Ala, da-pahanduka-ya i Ma-matua, na Ala Ihirailu.

⁴²Nda danandi-anya na mbihana Nyuna, na lodu pahàla-naha welingu la papada,

⁴³ba nawunda-ha da pa-hangàtarungu la Mehiru, dàngu da pa-maratangungu la maràda Huangu.

⁴⁴Da lukuda, Nyuna ma-pambeliha wai ria, hi lupa nda peku unu-danya na waina.

⁴⁵Na-pamayila-ha wàngu kapelatu panda taü, hi namàta-nja da tanada ba na-pamolu-nja kapaki.

⁴⁶Na-patàka-nja ana kataru dàngu kabala, ma-pambuta-ha da pangangu dàngu da ihi woka.

⁴⁷Na-paruha-ha da pingi angguru-da wàngu ura watu mboka, dàngu da pingi kapilitu-da wàngu wai hamburungu kamàndalu.

⁴⁸Namàta-nja panggàna-ha ura watu mboka da bandada, dàngu pahira-ha kabàla[42] da bandada.

⁴⁹Na-hanubuku-nya na mbeni mbàringu-na na ma-kandulangu ba nawàngu pa-paràhangu hapamba maranongu ma-butuhu kayeku hi kiri mbota monungu-da.

⁵⁰Nda na-roputu-aya na hàngga-nanja nyuda, jàka ndia la paaï-ya na lurida, tàka na-patàlaru-ha wàngu tàparu.

⁵¹Na-pameti-ha da kawunga anada mini la nimbihu kuru uma tau Mehiru.

⁵²Hi na-kapipi-ya na banjaru-na beri kabàba mbimbi, nalonda-ha hi dali ningu la maràda telangu.

⁵³La kapipi-naha da-mambiru dàngu nda da-mangàdatu-a, tàka na muhuda da-tandaningu la tehiku.

⁵⁴Hi na-karia-nya na banjaru-na la tana matua-na, la ma-palindingu na pawàhi wikina Nyuna.

⁵⁵La hangga banjaru-na nanyara-ha da mangu tanangu lai nu hi napabe - berinya nu na tana la mbuu ndàba kabihu tau Ihirailu, na banjaru-na, hi peku ngia-danja da uma tera muhuda.

⁵⁶Tàka nyuda da-kawutaru dàngu da kamanya i Ala Hupu Majangga, da hupu liina nda-danunju-aha.

⁵⁷Da-kandulingu hama tuna da boku la kawunga-da, dàngu nda pamonu-nja hama tuna tandai pana kaleka.

⁵⁸Da ndubaku wànya ngia pa-hamayangu la marapu i Ala, dawuda-ya na pawutangu-na Nyuna wàngu kahala hadada.

⁵⁹Ba naita-yaka nuna, na-mbumbaru na hànggana i Ala, hi na-tulaku ailula-ha nyuda.

⁶⁰Na uma terana Nyuna la Hilu[43] na-dunjaku-nya, nu na ngia pa-ngiangu-na la honga tau pinu tana.

⁶¹Napuli-nya na Pàti Pa-njanjingu-na pa-tanawa-nya; na ninu maü mangunju-na nawàhi-ya muhu.

⁶²Nahàngga-nya na banjaru-na, na mangu na kangeha-na, namàta-nja ka pameti-ha wàngu hapanda.

⁶³Da bidi minida nahoba-ha epi; hi nda ningu ma-kanoma-ha da anakaria-da.

⁶⁴Da ratuda pa-pameti wànja hapanda, da kawini meti leida nda damàka-a pahii.

⁶⁵Lumbatu wàna i MIRI hama tuna ma-pawàla welingu la katuda-ya, hama tuna tau parii mahàla paunu angguru.

⁶⁶Na-nàhaku-ha da papana hi da kandulingu, dàngu lundu numaka ba na-pakàku-ha.

⁶⁷Tàka da wàlana i Yuhupu na tulaku-ha dàngu nda naleha-aya na kabihu Epuraïmu.

⁶⁸Na-paleha-na jiaya na kabihu Yahunda, dàngu na Palindi Hiungu na pambuha-na.

⁶⁹Na-pahada-nya na Umana hama tuna na ngia pa-ngiangu-na la awangu, dàngu hi hama tuna na pinu tana ba na-paundu-nya lundu nu - nu.

⁷⁰Naleha-ya i Ndautu atana, hi napiti-ya welingu la kabàba banda,

⁷¹welingu la ngia pa-radangu-na bai mbimbi, ka napawa-nya na Ihirailu na banjaru-na Nyuna.

⁷²Wàngu eti tànjina ba napawa-nja paraïna i Ndautu, dàngu nalonda limaha wàngu lima màpihu-na.