Read Kambera PAMALANGUNGU 79 Bible Online

PAMALANGUNGU 79 - Kambera bible

PAMALANGUNGU 79

¹Pamalangungu-na i Ahawàpu. Ou Ala, na banjaru manda tanda-kau Nyumu da-mandapu-nyaka na tana kangeha-mu. Da-pairaku-ya na Umamu, na Yeruhali da-nyungguru-ya.

²Da metida da atamu da damàta-nja hi danjadi pangaa banda matàmba. Da metida da tau pambuha-mu damàta-nja hi danjadi pa-kahili wàngu banda matàmba.

³La nggubulu parai Yeruhali da riada dambungu hama tuna wai; nda ningua matani-nja nyuda.

⁴Manjadi pa-paakangu wàngu la banjaru la winggiru-ma, dariki-nggama dàngu da-kamibi-nggama.

⁵Ou MIRI, lundu numaka na hànggamu, dàngu na pakilitungu-mu ba na-kandulangu hama epi?

⁶Hanubuku-nya na hànggamu la ba - banjaru manda tanda-kau Nyumu, dàngu la hau hanga - hau hanganji manda lumunggau Nyumu.

⁷Nadu ba mbàda pameti-dahaka da banjaru-mu, hi da-pakabu-ya na ngia pa-ngiangu-da.

⁸Àmbu huku-nggama ruku njala boku la mangilu-ma. Lu mila-nggama eti, ba ninggama la mbota monungu.

⁹Ndula-kama ou Ala, Ma-pamàna-nggama, jàmanja da njalama dàngu pahàla-kama lumunya na patembi wànggau Nyumu.

¹⁰Àmbu màtanya na banjaru hawiangu pa-paàrangu rukuma nyuma, “Nggini-yaka na Alada?” ba wàda. Màta ka maita-ya na pa-limbangu-mu la banjaru da ma-pameti-ha da atamu.

¹¹Tingiya na kanjaïku-da da tau tanawangu; màla àruki rukuna na mbihamu ka pahia-nja paluri da tau pa-hukungu meti.

¹²Ou MIRI, himbalu-hawa da njalada nuda da banjaru papihu wundangu ruku mbuu ndàbana na-pawawa-danggau Nyumu.

¹³Napa nyuma banjaru-mu, mbimbi papawa-mu, ma-pamalangu-nggau lundu nu - nu, dàngu mawotu-nggau Nyumu, lupa ana umbuku-ma.