Read Kambera PAMALANGUNGU 80 Bible Online

PAMALANGUNGU 80 - Kambera bible

PAMALANGUNGU 80

¹Nduma ma-kapipi tau maludu. Nunjuya na wiliku: Wàla mangàta. Pamalangungu pa-hakahingu-na i Ahawàpu.

²Ou Mini Pawangu Ihirailu, tingi-kama, Nyumu ma-kapipi-ya na wàlana i Yakupu ba beri kabàba-ya. Nyumu ma-mandapu la pinu patau awangu,[44] pawuwa pa-lohangu-wa wikimu

³la hangga kabihu Epuraïmu, Mbanyamingu dàngu Manahi. Paloha-nya na kodi màkamu lai nyuma, dàngu maiwa pa-pahàla-kama.

⁴Ou Ala, pahàmu beli-kama; tanara-kama wàngu màja etimu, jiangu-ma ba mamara.

⁵Ou MIRI Ala Hupu Mambiha, lundu pirangu-mapa bau hàngga, jiapa-kai ka na-hamayangu na banjaru-mu?

⁶Upapuna mànu-nggama wai matama, Upahanggina mànu-nggama wai wirama.

⁷Umàtanja da banjaru la winggiru-ma pa-palumu-nya na tanama nyuma hi da-hayidi mbaha eti da muhuma.

⁸Ou Ala Hupu Mambiha, pahàmu beli-kama; tanara-kama wàngu màja etimu, kapeku marama.

⁹Na banjaru-mu beri pingi angguru pa-paleli-mu welingu la Mehiru-ya. Da banjaru hawiangu uwànggaha, hiu pamula-ya na pingi angguru la tanada nyuda.

¹⁰Upalànyapu-nya tana pangia-na; hi na-paamu ta - tanjiku hi nambewa ndàbanya na tana mbutana.

¹¹Na-pamaü-nja da tandula, dàngu wàngu kahanga-na na-pandàda-nja da kajiu matika pajangga.

¹²Da laina dambewa lundu la Tehiku Padua, da kahuluku-na datoma la Luku Epuràtu.

¹³Ou Ala, nggikina hiu pàpaha da okana, hi lupa nimbihu-na na tau na ma-hanàhu-na peku pàpuna wuana?

¹⁴Nangiwa-ya wei rumba hi lupa naruha, dàngu nangaanya banda la maràda.

¹⁵Ou Ala Hupu Mambiha, mai beliwa, tanara-wa welingu la awangu dàngu hamata-ya na banjaru-mu.

¹⁶Pahàla-ya na banjaru na mahama pingi angguru pa-pamula wiki-munya, dàngu kalunga angguru pa-pakapingatu-mu.

¹⁷Mbàda punggu dàngu mbàda tunu-nanyaka muhu; màtawa ka patàlaru-ha paraïna hànggamu.

¹⁸Opanya na tau pambàda lehamu, na ana tau pamatua-mu ndumamu Nyumu.

¹⁹Nyuma duma nda ma-hiliru-apa welingu lai Nyumu; mangganya na lurima, jianguma ba mawotu-nggamu.

²⁰Ou MIRI Ala Hupu Mambiha, pajia beli-kama, tanara-kama wàngu màja etimu, kapeku marama.