Read Kambera PAMALANGUNGU 81 Bible Online

PAMALANGUNGU 81 - Kambera bible

PAMALANGUNGU 81

¹Nduma ma-kapipi tau maludu. Nunjuya na wiliku: Nggititu. Welingu lai Ahawàpu.

²Ludu-nyawa ludu wotungu ndumana i Ala, na kodi màkanda, paoi mbaha etingu-wa nduma Alana i Yakupu.

³Palàngi-ya na lamba ha-kapapa, wundawa wiliku, kàritu pa-hàmungu-wa jungga lamba dàngu jungga.

⁴Hapiiwa napiri la lodu bokulu-nda, la mbabu wula jiliku dàngu la tambulu wulangu.

⁵Nadu nuna ba huri lawiti-maya la Ihirailu, hangia hupu liina na Alana i Yakupu-maya.

⁶Na hupu lii nuna na-kawuku-ya nduma Ihirailu, ba nalaku hanggangu Nyuna pa-tumbaru-ya na Mehiru. Kurongu hilu panda tandanggu,

⁷“Mbàda àli-nggunyaka na ngàndi welingu la kundumu, dàngu ku-pukalu-yaka na katanga paduku wàngu welingu la limamu.

⁸La handuka-mi miwara, hi kumai pa-pamara-kai. Kuhema-kai welingu la kangguruku ngia pa-kawiningu-nggu, la mata wai Marimba kukama-nggai.

⁹Tingiya na panamu-nggunggai, ha banjaru-nggu, ou Ihirailu, làti jàkau tingika!

¹⁰Àmbu ningudu kamàla ala la hongami, àmbu lumungu kamàla ala weli nàmungu.

¹¹Nyungga jiaka MIRI Alami, malonda-kai paluhu welingu la Mehiru. Bai rimbangu kuwua-nggai pangangu.

¹²Tàka na banjaru-nggu nda nabihu patingi-ka, na Ihirailu nda nabihu pa-karadaku-ngga Nyungga.

¹³Tuna nuduka hi kumàta-nja patongguru etida; dàngu la pawunda pambuha eti wikida.

¹⁴Ai làti pàku na banjaru-nggu ka da-mbuhangu patingi-ka, làti pàku ka da-mbuhangu pa-karadaku-ngga Nyungga,

¹⁵jiangu-ma kurengga panyàku-ha da muhuda làti, hi ku-pakàku ndàbaha da muhuda.

¹⁶Da tau da ma-karaü-ngga eti napa ku-panyàku-ha, napa pa-hukungu-ha lundu nu - nu.

¹⁷Tàka na banjaru-nggu kuwua-nya pangangu uhu nggàndumu paleha, dàngu hi ku-pambihu-ya wàngu manggaluangu la omangu,” na mawàna.