Read Kambera PAMALANGUNGU 83 Bible Online

PAMALANGUNGU 83 - Kambera bible

PAMALANGUNGU 83

¹Pamalangungu-na i Ahawàpu: na ludu.

²Ou Ala, àmbu pàdi wàmu bia, àmbu angguluku hi jiapa ba ndii wàmu.

³Tàngaru, da muhumu hadumbalu-danyaka, da tau ma-karaü-ngga eti kawutaru-danyaka.

⁴Damàhi ba da-lakunda-ya la pa-tumbaru-ya na banjaru-mu; da-pahamangu pa-tumbaru-ya na banjaru paopa-mu.

⁵Dapanii, “Màla ka ta-pamija-ya na banjaru Ihirailu, ka àmbu hili namuya na tamuda,” wàda.

⁶Da banjaru da-kahaungu-ka, dàngu da-pahamangu pa-tumbaru-kau Nyumu:

⁷na banjaru Endumu dàngu Ihimailu, da tau Muapu dàngu Hanggaru;

⁸na banjaru Nggembàlu, Amungu dàngu Amaliku, na banjaru Pilitia dàngu Tiruhu.

⁹Hamangui na Ahuru mbàda pa-mbulungu-da lai nyuda, hi wihi lima wàlana i Lòtu-ha.

¹⁰Pahama-njawa nyuda hama tuda da tau Mindiangu, hama tuna i Hihera dàngu i Yambingu, la Luku Kihungu,

¹¹da pa-patàlaru la Enduru, da metida hi tuha pa-kamboka wàngu tana.

¹²Pahama-njawa da liku uruda hama tuda i Oripu dàngu i Heyipu, panyàku-ha da ma-hanggubu-nja hama tuda i Njembahu dàngu i Hàlamuna,

¹³nadu ba mbàda panii-dudaka, “Màla ka ta-mandapu-nya na tana ngia pa-ngiangu-na i Ala,” ba wàdadui.

¹⁴Ou Ala, hàbaru-njawa hama tuna kumburu tana, hama tuna rembi pa-hawuru ngàndi ngilu.

¹⁵Hama tuna epi ma-pamutungu omangu, hama tuna roka epi ma-pakehi palindi - palindi.

¹⁶Nyara-hawa wàngu ngilu mbangatu-mu, pa-kapòtuku-ha wàngu làpuru-mu.

¹⁷Ou MIRI, màta-njawa ka pawawa-ha, ka da-pajia-ya na kawaha-mu.

¹⁸Màtawa ka daingu pamakia-ha dàngu pa-daingu mangàdatu-da, màtawa ka da-pameti ahungu.

¹⁹Màla àruki ka dapinya ba didi-akau Mahupu Majangga, MIRI, ma-hanggubu-nya nggubulu-na na pinu tana.