Read Kambera PAMALANGUNGU 84 Bible Online

PAMALANGUNGU 84 - Kambera bible

PAMALANGUNGU 84

¹Nduma ma-kapipi tau maludu. Nunjuya na wiliku: Nggititu. Pamalangungu-da da tau Kora.

²Ai, kanjupu pambaha etiya na ngia pa-ngiangu-mu, ou Ala Hupu Mambiha!

³Na etinggu kanjupu rinju-nanya na Umamu, na tolu na hamangu-nggu na-paoingu ndumana i Ala maluri.

⁴Jiapa da manginu da-ngalangu umada dàngu da mbera wurungu da-ngalangu hibuda, ngia patuu-daha da anada la lihi ngia pawotu maraku mangumu dou MIRI Hupu Mambiha, na Hanganji dàngu na Alanggu duku.

⁵Kanjupu pa-ohangu-ha da tau ma-ngiangu la Umamu, dàngu da maludu wotu mànunggau.

⁶Oha-daka da tau ma-ngalangu àtalu welingu lai Nyumu, dàngu da ma-patikingu palua pa-kanandingu la Palindi Hiungu.

⁷Ba talànga lakuda ba dali la lola Mbaka, na lolangu nuna da-pambeli-ya ma-pamata waingu, na-pabundu làndanya kanyuru paraïna kawunga urangu.

⁸Na àtalu-da hama huka bonjangu-na, ba nàhunja la Hiungu, la ngia pa-pawuwangu-na wiki na Alada da ngara ndewaka.

⁹Tingiya na hamayangu-nggu, ou MIRI Ala Hupu Mambiha, Tanaü-ka ou Alana i Yakupu.

¹⁰Pa-maringu-ya na hanganji-ma, ou Ala, opa-nyawa na tau paleha-mu.

¹¹Narihi hàmupa ba hau lodu la Umamu welingu ba 1000 lodu la pangia hawiangu. Kupindi ningu la panjadi madai pindu la Uma Alanggu welingu la pa-ndàdiku la uma tau akatu.

¹²Nadu i MIRI Ala na maopa-nda dàngu na Hanganji Bokulu, nawua-nda pa-namungu dàngu tembi. Ndedi nggàrama duna mahàmu pa-tulaku-na la tau manda ningu nyurangu la lurina.

¹³Ou MIRI Hupu Mambiha, oha-naka na tau mawaikau Nyumu.