Read Kambera PAMALANGUNGU 88 Bible Online

PAMALANGUNGU 88 - Kambera bible

PAMALANGUNGU 88

¹Na ludu. Pamalangungu tau Kora. Nduma ma-kapipi tau maludu. Nunjuya na wiliku: Mahalàtu Lianutu. Ludu lii panaungu-na i Hemàngu, tau Ehirahi.

²Ou MIRI, Ala ma-pamàna-ngga, la rehi lodu kuwara-nggau Nyumu, dàngu la rehi rudungu ku-hurungu la hanggamu.

³Màla àruki ka natàka na hamayangu-nggu lai Nyumu, tingi àru-kiya na waranggu.

⁴Nadangu na handuka ma-pinjalu-ngga; na meti la ngaru pindu-yaka.

⁵Nyungga hama tuna tau mahangga-nya na meti-kaka, nda ningu ndoku-apa àtalu-nggu.[46]

⁶Pa-màtangu-ka la honga tau meti, hama tuna tau pa-pameti, ma-tanggunggulu la reti, hama tuna tau pa-maromba ailulu-mungga, tau panda hili ndulamu.

⁷Upatàda-ngga la lambongu ma-majolungu, la lambongu reti ma-majolungu dàngu ma-kapàtangu.

⁸Kanjupu mbotuya na hànggamu ba na-roduku-ngga, kumija-ka ruku pinjalu-nangga hànggamu.

⁹Da pata - tandanggu upawiliru-ha welingu lai nyungga, utuka palabu eti wàda nyuda. Pa-nggupulu-ka hi nda peku tambahi-nggu,

¹⁰da matanggu nda da-torungu ruku mayila. Nimbihu lodu kuwara-nggamu MIRI, dàngu ku-hamayangu wàngu pandemangu limanggu.

¹¹Uwundapa ihu pa-hangàtarungu nduma tau meti? Pekuda ihu nyuda pa-hadangu dàngu pahili wotunggau Nyumu?

¹²Ningu ihu mapeka-ya na pa-namungu-mu daa la reti, dàngu na tuturu-mu, nu la ngia pa-tàlaru?

¹³Ningu ihu mapinya na pa-hangàtarungu lai Nyumu la kapàtangu, jàka ndia na hàmumu la paraingu ngia pa-marombangu tau?

¹⁴Tàka nyungga duku ku-kamahi-nya na tula-mungga, ou MIRI, nimbihu mbaru ku-hamaya-nggau Nyumu.

¹⁵Ou MIRI, nggikina hiu tulaku-ka? Nggikina hiu pambeli-nya na matamu welingu lai nyungga?

¹⁶Weli pa-anakedangu-maka ba ku-mayila dàngu ba nanàpu-ngga meti, kuonja[47] ba ku-handepa-ya na hukungu welingu lai Nyumu.

¹⁷Kumija ruku hànggamu na ma-mbàringu; ku-tàlaru ruku hànjalu-mu na ma-wirungu.

¹⁸Malo - lodungu beri iwaya ba na-winggiru-ngga hànggamu, weli winggirungu ba na-nggupulu-ka.

¹⁹Da kandua hàmu etinggu upawiliru-ha welingu lai nyungga, jiaya na kapàtangu-a na maangu-ngga.