Read Kambera PAMALANGUNGU 89 Bible Online

PAMALANGUNGU 89 - Kambera bible

PAMALANGUNGU 89

¹Na ludu lii panaungu-na i Etangu, tau Ehirahi.

²Ou MIRI, ka kuludu mànunya wàngguka rukuna naaï namu-mungga, na tuturu-mu napa ku-bobaru-ya wàngguka la mbuu ndàba ana umbuku.

³Nadu ba kupinya na pa-namungu-mu lundu nu - nu-ya, na tuturu-mu na-ndapuru hama tuna na awangu.

⁴Tàka Nyumu, “Kutura-yaka na njanjinggu la tau paleha-nggu; mbàda harangu-ngguka lai Ndautu, atanggu:

⁵‘Ku-paundu-nya na kanjàka pareta-mu lundu nu - nu, napa da-mandapu-nya wàla ana umbuku-mu, wànggunya,’ ” wàmu.

⁶Ou MIRI, da pawunda-mu da pa-hangàtarungu nawotu-nja paraï kabungguru la awangu, dàngu daludu wànya na tuturu-mu.

⁷La awangu nda ningua mahama-nggau Nyumu, ou MIRI, nda ningu ngara dika la awangu mahama-nggau Nyumu.

⁸Patembi-kau Nyumu la honga tau matua, parihi mangàdatungu welingu la mbuu ndàba da maninja la winggiru-mu.

⁹MIRI, Ala Hupu Mambiha, nggamu hama kapàru-mu? Ututuru la mbuu ndàbana ou MIRI.

¹⁰Nyumu ma-kawaha-ya na tehiku mbeni, dàngu ma-pakahàna-ya na ngalingu mbangatu.

¹¹Na Rahàpu,[48] na nggarihu la tehiku upameti-ya, wàngu lima àtalu-mu uberaha da muhumu.

¹²Na awangu dàngu na tana mangu-munya, na pinu tana dàngu na ihina-ka ruku lima-munja.

¹³Nyumu mawulu-ya na dia dàngu na luru, na Palindi Tamburu dàngu Herumungu da-paoingu ndumamu Nyumu.

¹⁴Kanjupu bokulu-ya na mbihamu, dàngu kanjupu wirungu-ya na àtalu-mu!

¹⁵Na mola dàngu na uku lata pareta-munya, na pa-namungu dàngu na tuturu na-lohangu la mbuu ndàba pawunda-mu.

¹⁶Oha-naka na banjaru ma-lumungu wàngu hawola-na, da maluri la handaraku-mu ba ninggau, ou MIRI.

¹⁷Malo - lodungu ba dambaha eti dàngu pa-daingu undungu-da, ruku hàmumu.

¹⁸Uwua-nggama talu manàra, ruku hàmumu Nyumua hi matalu.

¹⁹Nadu na maopa-nggama ba tau paleha-munya, ou MIRI; na hanganji-ma manguna i Ala Matua Ihirailu-maya.

²⁰La handàka la harii mata, upaniinya na ata tuturu-mu, “Mbàda tula-nggunyaka na haàtu mini kaborangu, na haàtu na paleha-nggu welingu la rayatu, kuwotu pajangga-yaka.

²¹Kuhunggu-yaka i Ndautu atanggu, hi ku-katua-ya wàngu lonahu kalaratu.

²²Na àtalu-nggu napa naopa mànunya nyuna, na kodi màkanggu ka na-paàtalu-ya nyuna.

²³Nda jia pakàku-ananya muhu, dàngu nda jia roduku-ananya paraï tau akatu.

²⁴Napa ku-patàlaru-ha mbuu ndàbada da muhu, ku-pameti-ya nggamu biaya ma-karaü-nya eti.

²⁵Ku-tuturu-nya dàngu pa-daingu mbuha-nggunya, dàngu hi kubonja-ya na kawaha-na.

²⁶Napa ku-palera-nya na pa-hanganji-na, na ngabana welingu la Tehiku Padua lundu la Luku Epuràtu.

²⁷Napa nyuna napanii-ngga Nyungga, ‘Nyumu jiakau Amanggu, Alanggu, maopa-ngga dàngu ma-pamàna-ngga,’ wànangga.

²⁸Nyuna kutuya kawunga ananggu mini, na marihi pa-bokulu welingu la mbuu ndàba hanganji.

²⁹Pa-daingu mbuha-manggunya lundu nu - nu, na pa-njanjingu-nggu dàngu nyuna pa-daingu undungu-mana.

³⁰Na kanjàka pareta-na ku-pamàndu-nya ba ngala ninyapa na awangu pa-tangara-na na tana, dàngu wàla ana umbuku-mana na ma-mandapu-nya.

³¹Tàka jàka dapangga-ya na Ukunggu da ana umbuku-na, dàngu nda daluri nunjuya na hupu liinggu,

³²jàka nda da-wàrihu-ya na pa-kawuku-nggu dàngu hi dalànja-nya na kalaratu-nggu,

³³napa kuhuku wànja ràmbahu rukuna na pa-panggada, dàngu ku-pinjalu wànja manjurangu rukuda da nja - njalada.

³⁴Tàka i Ndautu pa-daingu mbuha-nggunya, nda jia kabeli-anggunya na tuturu-nggu.

³⁵Na pa-njanjingu-nggu dàngu nyuna nda ku-hinggilu-anya, nda ana hauma payila belinggu welingu la panjanji-nggu.

³⁶Ku-handàkangu-a lundu nu pa-harangu wànya na tamu matua-nggu; nda jia kambàliku-anggunya i Ndautu.

³⁷Na kanjàka pareta-na na torungu la ngala ninyapa na mata lodu, napa na-mandapu-nya wàla ana umbuku-na.

³⁸Na pa-hanganji-na ni mànunya hama tuna na wulangu, ba hakahii pangalangu la awangu-ya,” wàmu.

³⁹Tàka nàhu Nyumu muhàngga-nya na hanganji, uwàrunya dàngu utulaku-ya na tau paleha-mu.

⁴⁰Upabeta-nya na pa-njanjingu-mu dàngu atamu, ukawuka-nya na tubuku pareta-na la kapihaku.

⁴¹Da kilimbatu paraingu-na unyungguru-ha, da ngia pa-torungu-na utuha watu tanyungguru.

⁴²Mbuu ndàba na tau na manàhu-nya naramba-nja da manguna, jiaya na pa-paakangu wàngu la angu kotaku-na.

⁴³Uwuanja patalu wàngu da muhuna, hiu pahawola-ha mbuu ndàba da papana.

⁴⁴Da pambeni wàna upanjadi-ha la panda ningu linguda, ndau tula-anya la pabera.

⁴⁵Ukanjupu-ya na kawaha-na na ma-mangarangu, na kanjàka pareta-na utòkunya la tana.

⁴⁶Upadànggitu-ya na rehi bidi tauna, dàngu hiu pa-lumburu-nya makia.

⁴⁷Ou, MIRI lundu pirangu-mapa bau kawiningu? Lundu pirangu-mapa ba na-pakandula epingu na hànggamu?

⁴⁸Pangàda-kinya nggi tuna dànggitu-na na luringgu, uwulu-kama nyuma la mandapu-ma ba dika nda payatangu-kama.

⁴⁹Nggamu maluri pangalangu dàngu nda metina? Nggamu mamara welingu la reti?

⁵⁰Ou MIRI, nggiyaka na tanda pa-namungu-mu la kawunga-na, na panjanji wàngu harangu-mu lai Ndautu lumunya na tuturu-mu?

⁵¹Ngàdaya ou MIRI, nggiki paaka-dangga, nyungga atamu, ku-handepa-ya na-pawawa-dangga paraï da banjaru dangu.

⁵²Da muhumu da pawawa-ya na hanganji paleha-mu, ou MIRI, da-payudi-ya la nggi biaya nalaku ningu.

⁵³Wotu-nyawa i MIRI lundu nu - nu. Ka tuna nuwa! Amingu!