Read Kambera PAMALANGUNGU 9 Bible Online

PAMALANGUNGU 9 - Kambera bible

PAMALANGUNGU 9

¹Nduma ma-kapipi tau maludu, kikunya na wiliku Mutu-Lambingu. Pamalangungu-na i Ndautu.

²Weli etinggu ku-pamalangu-nggau MIRI, màta ka ku-bobaru-ha, wàngguka, da pawunda-mu da pa-hangàtarungu.

³Rukumu Nyumu hi kumbaha eti kuwotu-nya na tamumu, MIRI Hupu Majangga.

⁴La hanggamu da-punjilungu da papanggu hi dapalai; danjoru ba da-tunjuru hi dameti.

⁵Nyumu-màka mapulu angungga la palakara-nggu; rukuna bau tànji la ngara pawunda-muka.

⁶Uhukunja da banjaru dàngu da tau akatu mu-pamànji-ha; da tamuda mbàda podahu-mu-haka, pa-marombangu-haka lundu nu.

⁷Upamauha da muhu pa-kariangu paraingu-da, nda ningu-apa mahili ingaha.

⁸I MIRI na-pareta lundu nu - nu; na-pandolaku-ya na kajàka pareta-na pa-patanda-nya ngera na pinu tana.

⁹Wàngu mola na-pareta-ha da banjaru nda na-kabinggilu ba na-patanda-nya ngerada.

¹⁰I MIRI jia na ngia pahandera tau pa-kapidihu, ngia pa-hinggilu la rehi handuka.

¹¹Na tau matanda-kau, namonu-nggau ou MIRI, na tau malumu-nggau ndau màta-anya.

¹²Wotunya i MIRI na-pareta la Hiungu! Bobaru-ha da pawunda-na la ba - banjaru-ka!

¹³Nadu ba nanamu-ya na tau ma-mayila dàngu nda na-maromba-nya na kanjaïku-da; nahuku-nya na tau ma-pajanggilu.

¹⁴Tàngaru, ba dira pamayila-nangga muhu; namu àruka ou MIRI, pahàla àruka welingu la meti,

¹⁵ka kuwotu-nggau Nyumu la hangga mangia-nya la Yeruhali. Napa ku-kayaka mbaha eti rukuna bau pamara-ka.

¹⁶Da banjaru manda tandakau Nyumu napa da-kanabu la lambongu paàki wikida; da-harimbatu la remba pabata wikida.

¹⁷I MIRI na-palohangu wikina rukuna na botangu-na na matànji. Da tau akatu danjoru ruku pawunda wikida.

¹⁸Na meti, hupu njapu tau akatu-ya, dàngu nduma banjaru manda ihili-nya i Ala.

¹⁹Nda lundu nu-a ba maromba-nya na tau mila; nda na-pangalangu-a na nda ningu monungu-da da tau ma-mayila.

²⁰Hadangu-wa MIRI, patanda-nja ngerada da banjaru, àmbu pahia-nya na tau ka na-wotungu wikina.

²¹Màtanja ka da-mangàdatu, ou MIRI, dàngu ka da-pàdangu wikida ba tau pàku-aha.