Read Kambera PAMALANGUNGU 90 Bible Online

PAMALANGUNGU 90 - Kambera bible

PAMALANGUNGU 90

¹Na hamayangu-na i Muha, atana i Ala. Ou MIRI, Nyumu jiakau ngia pa-handera-ma lupa ana umbuku.

²Ba ndedi upadika-nja da palindi, uwuluya na tana dàngu na pinu tana, Nyumu jiakau Ala ma-palupangu, nda ningu mulamu nda ningu hupu njàpumu.

³Uparàha-nya na tau pabeli la ngia paweli-na, hi kumburu tana beliya hama la kawunga-na.

⁴Lai Nyumu na 1.000 ndaungu beri hau loduya, lodu kangeu mambàda làpahu; hama tuna na rehi njangga rudungu ma-dànggitu.

⁵Upamili-kama nyuma hama tuna manggadipangu kama, beri rumba ma-kalunga-kama;

⁶la mbaru natumbu hi na-hanggebaru, tàka na-malaï la malingu.

⁷Ma-katàtaku ruku mbenimu, ma-tàlaru pa-mbutangu ruku hànggamu.

⁸Da nja - njalama utuha la hanggamu, da njalama da ma-kawiningu muita-ha.

⁹Na-dànggitu na lurima ruku mbenimu, da-kanjupungu da ndaungu-ma hama tuna kayeku pa-pahàlangu.

¹⁰Na rehi lurima pihu kambulu ndau-ana, jàka ma-torungu ihima, walu kambulu ndauma. Tàka mayila-maaya na-pahunggu-ma; la hambeli luri dànggitu molungu-ma-amanya.

¹¹Nggamu mambàda pàdanya na mbàringu-na na hànggamu, nggamu mapinya na ruku mbenimu?

¹²Papeka-nggama la papàda-nya na dànggitu-na na lurima ka madedi tau maningu kanandingu-ma.

¹³Ou MIRI, lundu pirangu-mapa bau mbeni? Mila àruki-nggama eti nyuma yia atamu.

¹⁴Palànda-nya na mbuhamu-nggama hau mbaru - hau mbaru, ka ma-hawola dàngu ka maludu la ngala lurima.

¹⁵Uwua àru-nggama pa-ohangu hama tudana na mayila na paduku-ma la ndaungu - ndaungu mayila-ma.

¹⁶Pa-itangu-ya na pawunda-mu lai nyuma atamu, dàngu na mbiha mangarangu-mu la ana umbuku-ma.

¹⁷Ou MIRI Alama, pakanyuru-kamawa, ka da-paihi da paràma-maka.