Read Kambera PAMALANGUNGU 91 Bible Online

PAMALANGUNGU 91 - Kambera bible

PAMALANGUNGU 91

¹Na tau ma-handera lai Hupu Majangga, dàngu na ma-engangu la opangu-na i Hupu Mambiha,

²peku panii-nanya i MIRI, “Nyumu jiakau ma-kahiri dàngu maopa-ngga, jiakau Alanggu, Nyumu ngia pamonu-nggu,” wànanya.

³Napa na-pahàla-kau welingu la hanggàmaru ma-kambelingu, dàngu welingu la mbuu ndàba hidu pameti wàngu.

⁴Napa na-palumburu-nggau wàngu ruu kàpana, tàka hiu mambiru la lumbuna; na tuturu-na beri temingu-ya na ma-kahiri-kau.

⁵Àmbu mangàdatu-dunya na hanggàmaru la rudungu, jàka ndia na ma-hànjalu harabàndangu la lodu;

⁶àmbu mangginggitu-dunya na hanggàmaru màtaka la kapàtangu, jàka ndia na kabu matungu la tidu lodu.

⁷Jiapa ka 1.000-ya na mameti la karaha-mu, dàngu ka 10.000-ya la kawana-mu, tàka nyumu wiki nda nggàra ehi-amu.

⁸Jàkau pa-wilikungu mata la winggiru-mu, uitaya na tau akatu panggàna himbalu.

⁹Bau panjadi-ya i MIRI ba jiaya na ma-kahiri-kau, i Hupu Majangga ba jiaya na tindingu-mu.

¹⁰Nda jia nggàna-ananggau tàparu, na umamu nda jia pitaku-ananya pa-manjurangu wàngu.

¹¹I Ala na-palewa maranongu-na pamangga-nggau nyumu, paopa-nggau la nggi biakau laku ningu.

¹²Nyuda datema-kau la tàbalu limada, ka àmbu da tunjuru la watu da wihimu.

¹³Napa upangga kataru dàngu hinga, utarohaku kamboka hinga dàngu kataru mbana.

¹⁴Napanii i MIRI, “Napa ku-pamara-ya na tau na mambuha-ngga Nyungga, napa kuopa-nya nyuna na mapeka-ka Nyungga.

¹⁵Jàka nawara-ngga Nyungga, napa kuhema-ya. Napa kundula-ya la rehi handuka; ku-pamara-ya dàngu kuwua-nya tembi.

¹⁶Napa ku-pahoda wànya malai luri, dàngu hi ku-pamàna-nya,” wàna.