Read Kambera PAMALANGUNGU 92 Bible Online

PAMALANGUNGU 92 - Kambera bible

PAMALANGUNGU 92

¹Na ludu nduma lodu hangahu.

²Kanjupu hàmu-aya ba pamalangu-nggau Nyumu, ou MIRI, dàngu la pawotu-nggau Nyumu, Ala Hupu Majangga;

³pa-bobaru-ya na pa-namungu-mu la rehi mbaru, dàngu na tuturu-mu la rehi rudungu,

⁴ba wàngu pa-kàritu jungga hakambulu lulu, pa-kariangu jungga lamba dàngu jungga.

⁵Nadu da pawunda-mu da-pambaha etika, kuludu hawola ruku da paràma-mu.

⁶Kanjupu bokulu-ha da pawunda-mu, ou MIRI, kanjupu tanjiku-ha da kanandingu-mu!

⁷Nda da jàngapu-aha paraï tau nduba, nda da hàmburu-aha tau kambànga.

⁸Talànga wanguna da tau katadaku datumbu pa-kamboka rumbangu, dàngu da tau akatu da-bonjangu pawulu dàngu paluri mbokaru; ba tuna jiangu-ma ba patàlaru ailulu-ha,

⁹nadu ba Nyumu, MIRI ma-kawaha lundu nu - nu.

¹⁰Mapinya ba pa-pamànji-ha da muhumu, ou MIRI, mbuu ndàba da tau akatu ba papai - ihangu-ha.

¹¹Upakapàru-ka hama tuna hapi mbàtingu matàmba, dàngu upa-kanyuru wàngga pa-ohangu.

¹²Kuita-ha ba dakàku da muhunggu, da tau da mambàda hada ngàndingu pa-ndubaku-ka, mbàda rongu-ngguhaka da wulu akada.

¹³Da tau patutungu da-kalunga hama tuna pingi karumangu, datumbu kamboka hama tuna pingi kanjilu la Limbanongu.

¹⁴Nyuda hama tuna pingi ai pa-pamula la Umana i MIRI, hi da-hanggebaru la Uma Alanda,

¹⁵pingi ai mawua-mahapa la rehi kaweda-da, ma-padaingu pamuru dàngu pa-katombuhu.

¹⁶Nuna mbuti-duyaka ba namola i MIRI; Nyuna jiaya na ma-kahiri-ka nda ningua pa-lapingu-na.