Read Kambera PAMALANGUNGU 94 Bible Online

PAMALANGUNGU 94 - Kambera bible

PAMALANGUNGU 94

¹Ou Ala, Nyumu Ala matungu himbalu-kau, paloha-nyawa na pa-himbalungu-mu, ou MIRI.

²Hada ngàndingu-wa, ou Ma-patanda-nya ngera nggubulu-na na pinu tana, huku-njawa da tau nggoji tuda himbalu-na na pawunda-da.

³Ou MIRI, lundu pirangu-mapa ba da-hawola da tau akatu? Lundu pirangu-mapa, ou MIRI?

⁴Da-libungu kareuku haladiku, da-ngànjangu wànya na akatu-da.

⁵Da-kapidihu-ya na banjaru-mu, ou MIRI, da-pamuburu-ha da tau papindi-mu.

⁶Da-pameti kawini meti lei dàngu ana mamila dàngu tau nàmu ma-ndàdiku la paraingu yiana.

⁷Dapanii, “I MIRI nda naita-aya, na Alana i Yakupu nda na-patanda-wa-anya,” wàda.

⁸Ha banjaru-nggu, àmbi nduba timi nu, papekangu-wa la pawànya na eti diha kanandingu-mi!

⁹I Ala ma-pandoi kahilu, nda narongu-a ihu? Nyuna ma-pandoi mata, nda naita-a ihu?

¹⁰Nyuna ma-papeka-nja da banjaru, nda na-pahukungu-a ihu? Nyuna na ngguru mbutana na tau, nda ningua ihu papina?

¹¹I MIRI napinya na kanandingu tau, napinya na pawuku-da ba kahewa-ma-ana.

¹²Oha anaka na tau pa-papeka-mu, ou MIRI, na tau pa-ajaru-mu Uku - ukumu.

¹³Upangudu-ya na etina la lo - lodu handuka, hi lundu àki lambongu la payàpa tau akatu.

¹⁴Ba nda jia dunjaku-ananya na banjaru-na i MIRI; nda jia lànja-ananya na mangu na kangeha-na.

¹⁵Na uku pahili wàngu beliya la kabungguru pa-tandangu ngera, mbuu ndàba na tau patutungu na-pajia-ya.

¹⁶Nggamu ma-kahiri-ka la tau ma-katadaku? Nggamu ma-angungga la pahangga-nja da tau mawunda ma-akatu?

¹⁷Làti jàka ndau tulangga, ou MIRI, nda pira-ama-kinapa na lelingu-nggu la pangia tau meti.

¹⁸Kanabu-nggunyaka ba wàngguka la kanandingu-nggu, na pa-namungu-mu MIRI, ma-paundu-ngga hi ku-ndolaku bànduku.

¹⁹Jàka na-mangginggitu dàngu nda nangudu na etinggu, Nyumu ma-pamanda-ngga dàngu upahawola-ka.

²⁰Ndau paori-da-anja da ma-patandangu ngera da ma-akatu, da ma-palata-nya la uku na pawuku akatu-da.

²¹Da-pahamangu la pa-tumbaru tau patutungu, dàngu la pahuku pameti-ya na tau manda njala.

²²Tàka i MIRI jiaya na ma-kahiri-ka, na Alanggu jiaya na maopa-ngga.

²³Nahuku-nja da tau akatu tuda himbalu-na na akatu-da, hi natuha la nda pawidi ruku njalada. Napa i MIRI na Alanda na matuha la nda pawidi.