Read Kambera PAMALANGUNGU 97 Bible Online

PAMALANGUNGU 97 - Kambera bible

PAMALANGUNGU 97

¹I MIRI Hanganji-ya! Màtawa na pinu tana ka na-hawola, dàngu da nuha ka dambaha eti.

²Na-winggiru-nya karumangu dàngu kanjidingu; na mola dàngu na uku lata pareta-nanya.

³Nàhunya na epi la hanggana, na-pakehi-ha da muhu la winggiru-na.

⁴Na kabilaku-na na-hambila-nya na pinu tana, ngga - nggauhana na tana ba naita-ya Nyuna.

⁵Dalui da palindi hama tuna lilingu la hanggana i MIRI, la hanggana i MIRI ma-kawaha-ya nggubulu-na na pinu tana.

⁶Na awangu na-bobaru-ya na molana, mbuu ndàba na banjaru naita-ya na mangunju-na.

⁷Mbuu ndàbana na ma-hamayangu marapu pa-pamakia-ha, nyuda nu da ma-tàmbungu kuruda ruku banda manda palingu; mbuu ndàba da marapu napa da-marubuku[50] la hanggana i MIRI.

⁸Da ma-mandapu-nya la Hiungu dàngu da paraingu la Yahunda dambaha eti ba darongu-ya na botangu-na i MIRI.

⁹Nadu ba Nyumu, ou MIRI ma-kawaha-ya nggubulu-na na pinu tana; Nyumu urihi ndàbanja pa-bokulu mbuu ndàba da marapu.

¹⁰Ha nyimi mambuha-nya i MIRI, karaü-nyawa eti na akatu! Nadu i MIRI naopa-nya na luri banjaru-na, na-pamara-ha nyuda welingu la lima tau katadaku.

¹¹Na tau tànji eti naharii-nyaka hambila, na tau patutungu kanjupu mbaha etiya.

¹²Hawola-wa dimi ha tau tànji eti, rukuna na pawunda-na i MIRI, dàngu pamalangu-nyawa i Ala ma-matua.