Read Kambera PANGERANGU 10 Bible Online

PANGERANGU 10 - Kambera bible

PANGERANGU 10

¹Yiada-haka da lii panau-papekangu-na i Halomu: Na ana na ma-manggàna jiaya na pa-bokulu eti wàna na amana; na ana na manduba, na-pahanduka-ya na eti inana.

²Da pawulu da pa-ngalangu wàngu pa-lapingu nda pautu wàngu-aha; hauyai duna na luri tànji ba jiaya na ma-pamara.

³I MIRI nda jia màta-ananya pa-rimbangu na tau hàmu; tàka Nyuna napabe - betanya na tau akatu ka àmbu nangala-nya na parinju-na.

⁴Na tau mamayau jiangu-ma napa ba namila; na tau ma-maràna jiangu-ma napa ba nawulu.

⁵Na tau ma-manggàna na-pauhingu ihi paraïna la rehina, na tau na ma-katuda-ma-a la rehi kalàmitu ihi paraï, pa-makiàngu-nanya wikina.

⁶Na tau hàmu napa na-ngalangu kanyuru. Na mbana eti na-pakambelingu la kareuku tau akatu.

⁷Na ngera namuha da tau hàmu jiaya na kanyuru, tàka na tau akatu parengga marombangu-ya.

⁸Na tau pingu na-mbuhangu pa-kataku lii panaungu; na tau na manduba kareuku-na, na-njàrangu.

⁹Na tau tànji, na-mambiru na lurina; na tau panyonga angu jiangu-ma ba pinya.

¹⁰Nggamu makàpi-nya na ma-tubangu, patumbu-nanya maharui; nggamu ma-paita-nya njalana na anguna la ngaba, wuku-nanya na luri hàmu.[6]

¹¹Na kareuku tau hàmu, na-pawiti-nya na luri pa-ohangu, tàka la hambeli kareuku tau akatu, na-kawiningu na eti iraku.

¹²Na pa-umbingu na-patumbu-ya na pa-pahànggangu wàngu; na mbuhangu najàma-nja da njala mbuu ndàbada.

¹³Na tau na ma-dàkatu kanandingu-na natiki kare - reuku manggàna; na tau nduba ràka-mana ka ràmbahu-ya.

¹⁴Na tau manggàna na-pauhingu papingu wàngu; jàka na-kareuku na tau nduba, pa-yepingu-nanya hanggàmaru.

¹⁵Da pawulu wàngu naopa-nya na tau wulu, na mila tanjàriku na-pamija-ya na tau mila.

¹⁶Jàka wundaya na mahàmu, na wundana jiaya na luri pa-ohangu; jàka wundaya na manjala, na-pawiti-nya na njala marihi dangu.

¹⁷Nggamu ma-ihili-nya na hàngga nàrungu jiangu-ma naluri hàmu, nggamu ma-pajurangu papeka njalana ninya la hanggàmaru.

¹⁸Na tau ma-kawini-nya na karaü eti, tau kambàliku-ya. Na tau ma-bobaru-ya na pa-pulungu, tau ndubaya.

¹⁹Na-pabonjangu padangu na pa-banjarungu, bonjangu-mananyai pa-tabunggahu na ànda ma-hanggangu la njala; na tau na-maroputu-ya na làmana tau manggàna-ya.

²⁰Na kareuku tau hàmu, beri àmahu bara weli wingungu-ya; na kanandingu tau akatu nda na-palingu-a.

²¹Na kareuku tau hàmu, jiaya na kanyuru nduma tau dangu; na ndubana na tau nduba pameti-nanya wiki-maana.

²²Ruku kanyuru-na i MIRI-ma-a hi nawulu na tau; ruku mbangatu paràma nda peku bonjangu-ada da pawulu wàngu.

²³Na tau nduba na-mbuhangu pawunda njala; na tau manggàna na-rinjungu pahimbu-ya na kaminaku.

²⁴Na tau kunduhu eti nangala-nya na parinju-na; na tau akatu nangala-nya nggàraya na padira mangàdatu-na.

²⁵Jàka na-làndahungu na ngilu mbangatu, munangu-ma-ananya na tau akatu; tàka na tau tànji jiapa mànu-maya na kapingatu-na.

²⁶Àmbu palewa-duya na tau mayau, ba patumbu bia-nanya na ma-karaü, hama tuna na kadoha ma-pamayilu ngàndu jàka ndia kutu epi ma-pamalara mata.

²⁷Tembi-yawa i MIRI, napa namandai na lurimu; na tau akatu nameti ba ndedi jiaya na rehina.

²⁸Na monungu-na na tau hàmu na-pawiti-nya na-paohangu-na; na monungu-na na tau akatu nda ningua ihina.

²⁹Na tau tànji naopa-nya paraïna i MIRI, na tau akatu pa-patàlaru-ya.

³⁰Na tau kunduhu na-mambiru hàmu na lurina; na tau akatu nda nangia-anya na tana kangeha-na.

³¹Na tau kunduhu na-pabanjaru wàngu kareuku manggàna; na tau akatu pabita-nya na ngaruna.

³²Na kareuku tau kunduhu na-pahàmu eti; na kareuku tau akatu na-pahidu mànuha da eti.