Read Kambera PANGERANGU 11 Bible Online

PANGERANGU 11 - Kambera bible

PANGERANGU 11

¹I MIRI na-karaü-nya eti na tau na ma-hukutu palapingu na ma-hukutu pa-deningu nahàmu-nya eti.

²Na tau ngànjangu, napa pa-pawawa-ya; na tau karàda eti ma-manggàna-ya.

³Na tau hàmu nalonda-ya paraï huri tànjina; na tau ma-mbuhangu pa-kambàliku, na-palàjaru-ya kambàliku-na.

⁴Jàka hangganya na meti, da pawulu wàngu nda da-pawilingu-apa; namara na lurimu jàka na-kunduhu na etimu.

⁵Na ànda lurina na tau hàmu na-pandidaru-ya tànjina, tàka na tau akatu na-luaya la pa-làjaru.

⁶Na tau tànji namara ba na-kunduhu etina; na tau panda wai, na-hanjubulu ruku manganga etina.

⁷Jàka nameti na tau akatu, nameti-mbu na monungu-na; monungu kapàru wiki nda ningua linguna.

⁸Na tau maili lurina na-hinggilu welingu la handuka; na tau akatu na-ngalangu pabetangu.

⁹Na pa-banjarungu tau akatu pa-tàlaru wànguya; na kaminaku tau hàmu pamara wànguya.

¹⁰Na-mangarangu na paraingu jàka na-ngalangu paluri wàngu na tau tànji; na-paoingu na rayatu jàka nameti na tau akatu.

¹¹Na kanyuru-na na tau tànji na-panggaju-nya na paraingu; na kareuku tau akatu na-paruha-ya.

¹²Na pawawa-ya na tau hawiangu pawunda tau ndubaya; na tau ma-paeti, nda jia nggàra-a patiki-na.

¹³Na ma-bobaru kareuku nda pa-deningu nda ningua pakàpi-na, tàka na tau paràka pawai, pekuna la pa-kàpingu palakara.

¹⁴Na-taweharu na banjaru jàka nda ningu liku uru; hama huka danguda da ma-panaungu, hama huka danguna na mambiru.

¹⁵Na njanji la patanggu mbayaru wuta tau hawiangu pa-hanggàmaru wànguya; narihi hàmupa àmbu tama koru-duya nuna ka peku mambiru.

¹⁶Na kawini na ma-mambiru panggolu na-ngalangu tembi; na tau mbana eti na-pauhingu pawulu wàngu.

¹⁷Na tau hàmu eti pautu-nanya wikina; na tau mbana eti parunggi-nanya wikina.

¹⁸Na utuna na tau akatu, kamàla utu-aya, na utuna na tau mawunda mahàmu jiaya na utu ma-palangatàkangu.

¹⁹Nggamu ma-paandu la pawunda mahàmu, napa naluri pa-ohangu; nggamu ma-patidungu pawunda ma-akatu, hanggangu-nanya la meti.

²⁰I MIRI na-karaü-nya eti na tau na ma-akatu etina, tàka nambuha-nya na tau manda ningu nyurana.

²¹Na tau akatu lupangu-ma na-ngalangu hukungu; na tau hàmu jiangu-ma napa namara.

²²Na manandangu-na na kawini nda paeti hamana na tawuru marara la uru wei.

²³Na rinju etina na tau hàmu na-patàkangu mànu mahàmu, tàka na pamonu-na na tau akatu, jiaya na mbenima-a.

²⁴Ningu tau na ma-mbuhangu pa-wuangu, tàka na-bonjangu pawulu, ningu ma-mbuhangu pa-pananjarungu ma-bonjangu pamila.

²⁵Na tau na mawua pa-dangungu, napa nabundu làndangu, na tau na ma-mbuhangu pa-pandulangu, pandula-mbuya napa.

²⁶Nggamu ma-pabundungu uhu nggàndumu, naràtu-nya tau, tàka na tau na madangga-nya, na-ngalangu wotungu.

²⁷Nggamu ma-maràna pawunda mahàmu, nahàmu-nya tau; nggamu mahimbu ma-akatu, napa nanggàna-ya harui.

²⁸Nggamu ma-hamela wàngu pawulu-na, napa namunju hama tuna ruu ai meti; na tau maili lurina napa na-hanggebaru hama tuna bidi kalunga.

²⁹Na tau na ma-kubaru-ya na kuru umana, napa da-mbulangu hàla da maninja. Na tau nduba napa nalumu-nya na tau manggàna.

³⁰Na tau maili lurina na-lànyapu na lurina; na tau ma-manggàna na-bonjangu na makiku-nya.

³¹Jàka na-ngalangu-madu himbalu-na la pinu tana na tau hàmu, jiangu-maka duna napa ba na-ngalangu hukungu na tau akatu dàngu na mawunda manjala.