Read Kambera PANGERANGU 13 Bible Online

PANGERANGU 13 - Kambera bible

PANGERANGU 13

¹Na ana ma-paeti na-katana-ya jàka napanau-nya amana; na tau ngànjangu nda nabihu ka kanyàngi-nya.

²Na kareuku tau hàmu pautu wànguya; na tau manda tànji nambuha-nya na pa-janggilu.

³Na tau ma-pananjarungu la kareuku-na naluri mambiru; na tau na ma-àtalu kareuku biana najengi-nya ura dedi.

⁴Na tau mayau nadangu na parinju-na tàka nda haua pangala-na; na tau na ma-mbangatu paràma nangala ndàbanya na parinju-naka.

⁵Na tau patutungu na-karaü-nya eti na kambàliku, na nggoda nggàduku tau akatu pa-makia wànguya dàngu pa-paakangu-ya.

⁶Na patutungu naopa-nya na tau na maluri kunduhu; na akatu na-pamija-ya na tau njala.

⁷Ningu ma-pahada tau wulungu, hi nda ningui pawulu wàna; hi ningui ma-pahada tau milangu hi dira wulu biayai.

⁸Na tau wulu na-paluhu ndui ka peku luri mambiru-na; na tau mila namara welingu la pangàdungu.

⁹Na tau maili lurina beri hambila ma-handaraku-ya; na tau akatu beri palita mambàda-ya.

¹⁰Na abungu na-patàka-nya na palumungu-ma-a; na tau manggàna na-mbuhangu pa-kataku lii papekangu.

¹¹Da pawulu wàngu da mamuda la pangala-nja darengga pa-kawawaku; tàka da banda da pa-ngalangu ba wàngu pangeri kangutungu da parukangu pa-pabonjangu.

¹²Jàka nda nalu hàrangu na monungu, nalàlu na eti dalu; jàka ngalangu pawuku, da-minjalu da eti.

¹³Na tau na manda ihili-nya na lii papekangu-na i MIRI, pa-hanggamaru-nanya wikina; na tau ma-karadaku-nya na Ukuna i Ala napa na-ngalangu wundana.

¹⁴Na lii papekangu tau manggàna beri pingi pola pa-ohangu-ya; jàka ningu pangàdungu, nuna na lii papekangu na ma-pamara-ya.

¹⁵Na tau ma-paeti pa-wotungu-ya; na tau panda monungu napa naharui na lurina.

¹⁶Na tau manggàna na-padiha mangilu-nyapa ba ndedi na-palaku-ya; na tau nduba na-wewaru-nya na panduba wàna.

¹⁷Na tau pa-papalewa na manda palingu na-patàka-nya na hanggàmaru; na tau pa-palewa naràka pa-monungu jiangu-ma na-ondungu.

¹⁸Na tau manda bihu ka papeka-nya nanjadi tau mila dàngu tau kudu; na tau ma-kataku lii panaungu natembi-ya anguna.

¹⁹Nahàmu langatàka jàka ngalanya na pawuku! Na tau na manduba nda nabihu pa-pambelingu welingu la akatu.

²⁰Na tau ma-panggolu dànya na tau manggàna, nanjadi tau manggàna; na tau ma-panggolu dàngu tau nduba, napa na-hanggàmaru.

²¹Na tau njala nayaulu mànuya kaba ura na tau hàmu na-ngalangu mànu pa-ohangu.

²²Na tau hàmu na-panduma-nja pawulu-na da ana umbuku-na; da pawulu tau njala pa-pahàmu-ha nduma tau ma-kunduhu lurina.

²³Na tana bulu napeku pawua padaa-nya pangangu na tau mila; tàka na nda tànji na-pawiti-nya hi nda paràma-ya nuna na tana.

²⁴Nda pa-ràmbahu ana, hamana ba nda pambuha-nya nyuna; jàka mbuhanya, lupangu-ma toru mbeni pa-ràmbahu-ya nyuna.

²⁵Na tau na mahàmu natoma mànu na lurina, tàka na tau akatu duna nanjaka mànunya.