Read Kambera PANGERANGU 14 Bible Online

PANGERANGU 14 - Kambera bible

PANGERANGU 14

¹Na kuru uma pa-pahadangu-ya ruku manggàna tau kawini, tàka pa-nyungguru-ya ruku ndubana.

²Na tau na ma-patutungu na-mangàdatu dàngu natembi-ya i MIRI Ala; na tau manda kunduhu lurina na-pawawa-ya Nyuna.

³Ruku abungu-na, na-mbuhangu pa-pabokulu wikina na tau nduba; na tau manggàna napa namangga-nya paraï kareuku wikina.

⁴Nda ningu hapi luku, nda ningumbu ihi woka; wàngu kapàru hapi, da-pabundungu da ihi paraï.

⁵Na hakahii ma-patutungu napeka mànu ma-padeningu, na hakahii na paràka panda wai na-kambàliku mànu.

⁶Na tau ngànjangu nda jia njadi-ana tau manggàna, tàka na tau halimu kotu namuda ba na pa-papekangu wikina.

⁷Àmbu pa-oringu-du la tau nduba; ba nda ningua ràka pa-papeka wànanggau.

⁸Na tau manggàna napinya jàka nggàraya bàdi na pawunda-na, na tau nduba na-panyonga-ya paraï ndubana.

⁹Na tau nduba nda na-kawelangu-a jàka jàmanja da njalana jàka ndiakai; na tau hàmu duna na-mbuhangu ka jàmanja da njalana.

¹⁰Na mbaha eti dàngu na handuka eti pa-pakàpa la eti daluha; na tau hawiangu nda napeku-a la papàda karia-nya.

¹¹Na uma tau hàmu na-ndolaku pa-daingu; na uma tau akatu jiangu-ma nanjoru.

¹²Ningu ànda na matànji ba itaya, tàka la hupu njàpuna nuna na ànda hanggangu-nanya la meti.

¹³La hapapa-na nariki talànga wanguna ninya na hii; na hawola na-ngalangu panjàpu wàngu handuka.

¹⁴Na tau akatu napàpu-ya na wua akatu-na, na tau hàmu napàpu-ya na wua hàmuna.

¹⁵Na tau nduba nawai hàla biaya na kareuku, na tau manggàna na-pananjarungu la pawunda-na.

¹⁶Na tau paeti narima mànungu dàngu na-wiliru-nya na akatu, na tau nduba narengga hei na ma-karaü, hi namangu pa-mandangu.

¹⁷Na tau kàli mbeni, wàngu-nanya ndubana; na tau manggàna na-lerangu etina.

¹⁸Na tau manda ndàmangu napa nalua-ya la nduba; na tau manggàna na-bonjangu na pinguna.

¹⁹Na tau akatu na-karuduku la tau na ma-kunduhu etina, la pakarai ka peku mila-nanya eti.

²⁰Na tau mila nda pambuha-anya jiapa-kai paraï da angu lànggina; tàka na tau wulu duna dadangu da kandua-na.

²¹Nggamu ma-pawawa tau hawiangu wunda-nanya manjala; nggamu mahàmu-nya eti na tau mila, pa-paohangu-ya.

²²Nggamu mawunda mahàmu, pawaiya dàngu patembi-ya; nggamu mawuku-ya na ma-akatu ninya la ànda njàrangu.

²³La nimbihu paràma ninya na pautu wangu; na pabanjarungu manda palingu na pawiti-nya na pamila wàngu.

²⁴Na tau manggàna pa-wotungu-ya ruku manggàna-na, na tau nduba patanda-ya ruku ndubana.

²⁵Jàka na-patànjingu na haàtu hakahii, pamara-nanya luri; jàka na-kambàliku, kalekangu-nanya anguna.

²⁶Na tau ma-tuturu lai MIRI na-mambiru na lurina, tàka na ihi kuru umana ningu ngia pa-handera-na.

²⁷Na tuturu lai MIRI jiaya na pingi pola pa-ohangu; dàngu àndaya pa-hinggilu wànya na meti.

²⁸Na bunjuku-na na maràmba jiaya na danguna na rayatu-na; nda ninya na rayatu nda na-ngalangu-a pa-kawaha.

²⁹Na tau manggàna nda narengga mbenia; na tau nduba nda namàka-a pa-roputu wikina.

³⁰Na eti mandangu pa-hayandalu wànguya; na ngera himbu kangeha wiki beri hidu pameti wànguya.

³¹Nggamu mawunda mahàmu la tau mila, tembi-nanya na Alana; nggamu ma-kapidihu tau lamanga, paaka-nanya na Ma-padika-nya.

³²Na tau akatu na-tàlaru ruku pawunda-na na ma-akatu, na tau hàmu naopa-nya paraï luri tànjina.

³³Na kaminaku ni mànu-manya la kanandingu tau ma-paeti; tàka pa-kapidihu-ya la kanandingu tau nduba.

³⁴Na tànji dàngu na mahàmu jijiku-nanya na mandapu-na na banjaru, tàka na njala na pawiti-nya na paràpu wàna na banjaru.

³⁵Na maràmba nahàmu-nya eti na panggawi na ma-ànjaru; tàka nambeni-nya na panggawi na manda palaku wai ngerana.