Read Kambera PANGERANGU 16 Bible Online

PANGERANGU 16 - Kambera bible

PANGERANGU 16

¹Peku-mana la pa-pakaka hahangu na tau, tàka i Ala na ma-wuangu botangu.

²Nimbihu-na na pawunda tau talànga wanguna nahàmu la pakaka wikina, tàka i MIRI duna na-mahukutu-ya na pawuku etina.

³Huharu-nya lai MIRI mbuu ndàbada da pakakangu-mu, napa ungalangu-ma pa-palaku-ha.

⁴Mbuu ndàba-daka da pawunda-na i MIRI, ninguma ngia pa-orangu-na; tàka na ngia pa-orangu nduma tau àkatu jiaya na tàlaru.

⁵Mbuu ndàbana na tau ngànjangu na-karaü-nya eti paraïna i MIRI; nda napuli-anja pa-pahàla welingu la hukungu.

⁶Na tau na ma-tuturu-nya i Ala na-ngalangu paaïngu; na tau ma-mangàdatu-nya i MIRI na-hinggilu welingu la ma-akatu mbuu ndàbana.

⁷Jàka mu-pambaha etiya i MIRI, na-panjadi-ha angumu da muhu-muka.

⁸Narihi-pa pahàmu ba ngalangu hawutu wàngu matànji, welingu ba ngalangu madangu wàngu pa-lapingu.

⁹Na-ngalangu-ma pa-pakaka hahangu na tau, tàka i Ala duna na mauli-nya na ànda lurina.

¹⁰Na maràmba na-ngalangu kuaha-na welingu lai Ala, jia ba tuna, hi nda nanjala-a la botangu-na.

¹¹Na pambuha-na i MIRI ka natànji na tau la danggangu-na, dàngumbu la pakina hukutu dàngu timbangu.

¹²La ma-kuaha, na ngera wunda ma-akatu ma-iraku-ya, nadu na pareta-na hi na-undungu ruku matànji-a.

¹³Na lii kaloka ma-tubangu na-pambaha eti ma-katangu kuaha, na tau na ma-patànjingu la kareuku-na nambuha-nya.

¹⁴Na mbenina na maràmba beri lii hukungu metiya; na tau ma-manggàna nahimbu-nya wihu ka pa-wadaru-ya.

¹⁵Na hàmu etina na maràmba na-patàkangu luri mambiru, beri hamana na karumangu ma-papurungu urangu la wula wàndu.

¹⁶Ba ngalanya na manggàna kanjupu rihi hàmu-mayapa welingu ba ngalangu àmahu rara; na ngalanya na papingu wàngu narihi pa-wilingu-pa welingu ba ngalangu àmahu bara.

¹⁷Na tau hàmu na-wiliru-nya na ma-akatu; na tau na maeti wànya na huri lurina, opangu-nanya wikina.

¹⁸Na ngànjangu pa-taweharu wànguya; na abungu pa-tanyungguru wànguya.

¹⁹Narihi-pa pahàmu ka karàda eti dàngu ka nda ningukai banda malanja, welingu ba tundunja da tau ngànjangu dàngu ba luri wànja da banda malanja parambangu-da.

²⁰Eti wànyawa jàka nggàraya na lii papekangu lai nyumu, napa mungala-nya na mahàmu. Pawaiwa lai MIRI, napa mungala-nya na pa-ohangu.

²¹Na tau manggàna patanda-ya la kanandingu-na na ma-dàkatu; na huri kareuku-na na ma-payila eti, na pawiti-nya napawai wànya na papanii-na.

²²Na manggàna jia na pingi pola luri pa-ohangu-na na tau paeti; na tau nduba na-pa-mayila-ya nduba wikina.

²³Na kanandingu tau paeti na-pawiti-nya na kareuku manggàna-na, tàka hi hama huka waiya na lii papekangu-na.

²⁴Na kareuku ma-minangu beri manggaluangu-ya; nalàngga ba pàdanya dàngu na-pahayandalu tàda ihi.

²⁵Ningu ànda na matànji ba itaya, tàka na hupu njàpuna na ànda nuna na-hanggangu la meti.

²⁶Na rinjungu la pangangu jiaya na mawànda-ya na tau la pa-pamukarungu; mulana na kambuna lupangu naràma lerangu.

²⁷Na tau akatu nahimbu wihu ka pa-hanggàmaru anguna patau; na kareuku-na na-akatu hama epi pa-lawarangu-ya.

²⁸Na tau kaleka eti na-patumbu-ya na pa-lumungu; na mapawau tamu anguna na-pahewangu ma-pakandua nditakungu.

²⁹Na tau mbana eti na-panyonga-ha da anguna, hi nairu ngàndiha la hanggàmaru.

³⁰Murima-nya na tau na mariki miri dàngu na ma-pakamàdikungu mata, nu pakakangu-nanya ma-akatu la etina.

³¹Na tau tànji pa-wuangu malai luriya; da uwangu-na beri tubuku ma-kalilangu-ha.

³²Na manda rengga mbeni nahàmu-pa welingu ba katangu kuaha; na roputu wiki narihi hàmupa welingu ba bera paraingu.

³³La papi wàngu ura, natungu undi na tau, tàka na matunya hemana jiaya i MIRI wikima-a duna.