Read Kambera PANGERANGU 17 Bible Online

PANGERANGU 17 - Kambera bible

PANGERANGU 17

¹Narihi hàmupa ba ngangu uhu handàka hoba pa-kariangu mambiru, welingu la pangangu ma-màtaku bundu làndangu pa-kariangu parau ngaru.

²Na ata na mamàhi napa na-kawaha-ya na ana na mawunda pa-makia wàngu; hi peku ngalangu-na kangeha-na pa-kariangu da angu dedina nu na ana.

³Àmahu rara dàngu àmahu bara pa-kamangu la epiha, tàka da eti tau pakama-na i MIRI-ha.

⁴Na tau akatu nakiku-nya na lii kamahingu ma-akatu, na tau kambàliku na-mbuhangu pa-patingingu kareuku mapawau anguna.

⁵Nggamu ma-paakangu tau mamila, pawawa-nanya i Ala na ma-padika-nya. Nggamu ma-nggaüru eti wànya na manjurangu-na na tau, lupangu-ma na-ngalangu hukungu.

⁶Na pa-bokulu eti wàna na tau mambàda kaweda jiaha da ana umbuku-na; na pa-bokulu eti wàda da ana jiaha da ina amada.

⁷Na tau patembi nda ràka-ana ka na-kareuku kambàliku; na tau nduba nda ràka-ana la patuu kareuku ma-pawilingu.

⁸Ningu na makaka-ya da ndui pakei li hambeli da-ngalangu pawunda pa-hangàtarungu; wànja da ndui pakei li hambeli peku pa-palaku hàlaya jàka nggàra biaya.

⁹Jàka urinjungu ka nambuha-nggau angumu, ujàmanja bàdi da njalana. La pawuda mànuha da njala pambota wàna na pa-kanduangu-maaya.

¹⁰Handàkangu pa-kanyàngi la tau paeti narihi pa-wilingu-pa welingu la hangahu ràmbahu la tau nduba.

¹¹Na tau akatu na-patumbu mànu pa-kanyaüru wàngu, tàka na meti namai tomaya beri hama tuna na pa-palewa mambana eti.

¹²Narihi hàmupa ba hàmburu-ya na ina mbaruangu na ma-mbulangu anana, welingu ba hàmburu-ya na tau nduba na ma-nutakungu pawunda-ya na panduba wàna.

¹³Nggamu ma-papapa wànya akatu na mahàmu, nda peku paluhu-mbuya na ma-akatu welingu la umana.

¹⁴Ba pakiri-nya na pa-lumungu hamana ba bowaya na londa wai; jia ba tuna yilangu-wa ba ndedi na pakiringu na pa-lumungu.

¹⁵I MIRI na-karaü-nya eti na tau na ma-pamàna-nya na tau katadaku, tàka hi na-panjala-ya na tau manda njala.

¹⁶Nda ningu linguna na tau nduba ba na-pambuta-ha da nduina la pahimbu manggàna; maa ba nda kanandingu ma-tubangu-aya na pamangu-na.

¹⁷Na haàtu kandua na-tuturu mànuma la anguna, tàka na haàtu angu dedi angu pàdangu haruiya.

¹⁸Na tau ma-panjanjingu la patanggu-nja da wutangu anguna tau manduba-maya.

¹⁹Na tau na mambuha-nya na njala, na-mbuhangu pa-palumungu. Na tau bàkulu ngaru, himbu-nanya pa-taweharu wàngu.

²⁰Na haàtu tau pa-lapingu nda jia pa-ohangu-ana, na tau kahanga làma napa na-ngalangu hanggàmaru.

²¹Ba ngalangu ana manduba nda halindingu hamana na-ngalangu hawina; ba njadi amana na ana manduba nda pa-hawola wàngu-aya.

²²Na eti na ma-nggaüru na-pahayandalu tàda ihi; na eti na ma-kamundangu na-poraku-ya na ringgitu.

²³Na hakimu na ma-hiliru, nakei winingu ndui pawua pa-runungu tàka hi nda na-palaku-ya na tànji.

²⁴Na pawuku tau ma-jàngapu kanandingu-na jiaya ka-ngalangu papingu wàngu, tàka na pawuku tau nduba nda papi-anya tubana.

²⁵Na ana na manduba na-pahanduka amana, dàngu na-pahawina inana.

²⁶Nda na-patuba-a la pa-panggàna-nya ndànda na tau manda njala; nda na patuba-a la pa-kapidihu-ya na tau ma-matua huri lurina.

²⁷Na tau na ma-dàkatu kanandingu-na nda na-kareuku padangu-a. Na tau manggàna na-mandangu manuma duna.

²⁸Na haàtu tau nduba làbu mapingu dàngu ma-manggàna-ya wànanya tau jàka pàdi wàna ba nda na-kareuku.