Read Kambera PANGERANGU 19 Bible Online

PANGERANGU 19 - Kambera bible

PANGERANGU 19

¹Narihi hàmupa na tau mila na ma-kunduhu lurina, welingu la tau nduba na ma-mbuhangu pa-kambàliku.

²Nda nahàmu-a ba maràna paràma hi nda ningui papingu wàngu; na tau na mari - ringana jiangu-ma napa na-hanjàliru.

³Ningu tau ma-parunggi wikina rukuna na ndubana, hàlaka hi panjala ninanyai MIRI la ngerana nuna.

⁴Na tau wulu, na-bonjangu mànu padangu da anguna; na tau mila duna nalaku wàrunya anguna.

⁵Na tau na ma-kambàliku la hangga ma-patandangu ngera, nda jia hinggilu-ana welingu la hukungu.

⁶Nimbihu-na tau nahimbu wihuna ka naora-nya eti paraï tau mangia ngaba; mbuu ndàbana na tau na-mbuhangu pa-kandua-nya na tau màjangu.

⁷Na tau mila nda na-ihili-anya paraï angu dedina, rihi-ipa duna paraï anguna. Jiapa ka nggiki himbuna wihuna, nda na-ngalangu-a pa-paütu-ha nyuda.

⁸Nggamu mayaulu-ya na papingu wàngu, namu-nanya wikina; dàngu nggamu manamu beliha da pambàda papekangu-ya, naluri pa-ohangu.

⁹Na tau na ma-kambàliku la hangga ma-patandangu ngera jiangu-ma ba hukunya dàngu ba pa-tàlaru-ya.

¹⁰Nda ràka-ana ba na-mbokaru na lurina na tau nduba, dàngu nda na-patuba-mbu na ata ba na-pareta-ya na mirina.

¹¹Na tau manggàna na-ngalangu panàdi-ya na mbenina. Nyuna pa-wotungu-ya ba nda na-ihili-dunya na njala tau lai nyuna.

¹²Na hànggana na maràmba beri hama kangaü hingaya; na hàmuna na maràmba beri wai hamburungu mahini-ha da ngara matumbu.

¹³Na ana na manduba na-ngalangu pa-palàjaru-ya na amana. Na papaha na ma-mbuhangu pa-kambunguku beri hamana na wai na manda pànjangu pa-kambàtiku.

¹⁴Uma dàngu banda malanja pekuna la pangala-nja welingu la ma-kaweda, tàka na papaha ma-manggàna pawua juana i MIRI-ya duna.

¹⁵Na patai eti na-pawiti-nya na tau pa-katuda mangandu, na tau mamayau napa na-rimbangu.

¹⁶Na tau ma-karadaku-nja da hupu liina i Ala napa namara, na tau na manda tunja wilida napa nameti.

¹⁷Na ndula tau mila hama biana ba wua paruta-nya i MIRI; napa i MIRI-ma duna na matunya himbalu-na.

¹⁸Àrapu-ya na anamu ba ningu-ipa pa-monungu; jàka ndia, rinju-munya na làjaru-na.

¹⁹Màtawa na tau na marengga la pambeni ka napàda wikinya na injana. Jàkau ndulaya bonja-munya, na mbeni-maana.

²⁰Jàka mu-mbuhangu pa-ajaru dàngu parongu lii panaungu, njadi-dumu-nyaka napa tau manggàna.

²¹Na tau nadangu na pa-pakakangu-na, tàka jiaya na botangu-na i MIRI duna na ma-hàrangu.

²²Na huri na pa-monungu welingu la tau jiaya na tuturu-na. Narihi hàmupa ka mila welingu ba njadi ma-kambàliku.

²³Tembi-yawa i MIRI, napa na-lànyapu na lurimu; napa muluri patoma dàngu mu-pahàla welingu la hanggàmaru.

²⁴Ningu tau ma-kanjupu mayauya; nambotu-mbu na etina la pahoba pangangu.

²⁵Jàka hukunya na tau ngànjangu, na-ngalangu lii papekangu na tau manda manyàmungu. Jàka kanyàngi-nya na tau paeti, napa na-bonjangu pa-manggàna.

²⁶Na ana na ma-pamayila-ha dàngu na mayaulu-ha da ina amana, jia-yaka na ana na ma-pamakiangu dàngu na pa-payudi.

²⁷Ha ananggu, jàka ndau hili mbuhangu-pa la pa-ajaru, jiangu-ma muromba-nja da pambàda ajaru-mu.

²⁸Na hakahii nda patuba hamana na pa-halela-ya na uku; na-pahanggàmaru tau, mahàmu-ya la tau akatu.

²⁹Na tau nduba majangga etina jiangu-ma ba paluya.