Read Kambera PANGERANGU 21 Bible Online

PANGERANGU 21 - Kambera bible

PANGERANGU 21

¹Hama tuna ba na-paloku-ya na wai luku i MIRI, ka na-lulungu kikunya na pambuha-na Nyuna, tuna numbu ba na-kapipi-ya na-kanandingu hanganji.

²Nimbihu-na pawunda tau talànga wanguna ma-tubangu-ha la kanandingu wikina, tàka i MIRI duna na ma-patanda-nya na pawuku etina.

³Na pawunda mamola dàngu ma-tubangu narihi liyapa na etina i MIRI welingu la mbuu ndàbada da hunggu maraku.

⁴Na tau akatu nanjala, ba na-kuaha duya paraï abungu dàngu ngànjangu-na.

⁵Na pa-pakakangu la eti tau ma-maràna nangàndi bundungu; na pawunda nggànggatu na-patàka-nya na kawawaku.

⁶Da pawulu pangala wàngu kaputingu darengga mbulangu dàngu dangàndi-ya na tau la lambongu reti.

⁷Na tau akatu nda na-mbuhangu panunju-ya na uku; na-pamayila-ya paraï mbana eti wikina.

⁸Na tau na manjala, na-pawiki - wikitungu na àndana; na tau na mahàmu na-patutungu mànu na lurina.

⁹Ngiangu la kabihu hindi narihi hàmupa welingu ba ngia kahau uma dànya na papaha ma-mbuhangu pa-pahànggangu.

¹⁰Na tau akatu narinju mànungu pawunda-ya na ma-akatu; nggamu biaya na tau nda ninguma pamila-na eti.

¹¹Jàka hukunya na tau paakangu, nanjadi lii papekangu la tau manda ndàmangu. Jàka hàngga nàrunya na tau paeti, na pa-bonjangu pa-manggàna.

¹²I Ala Mahupu-mola napinya nggàraya na matumbu la uma tau katadaku. Napa na-patiri nggubulu-nja nyuda hi da-tàlaru.

¹³Nggamu manda bihu parongu-ya na pa-ngodungu tau manda patoma lurina nda pa-patingi-anya napa jàka nyuna wiki na makarai pa-ndulangu.

¹⁴Ka pa-wadaru-ya na mbeni dàngu na ma-karaü, wua winingu bia pawua juangu.

¹⁵Jàka palaku-ya na mamola nambaha eti na tau hàmu, tàka na tau akatu napa na mangàdatu.

¹⁶Na tau manda kikunya na huri luri tau paeti, lupama natàka la pangia tau meti.

¹⁷Na tau na ma-mbuhangu paluri mànu la mahàmu, pa-daingu japuna na lurina; na tau na ma-mbuhangu paluri borakungu nda na-ngalangu-a pawulu.

¹⁸Jàka nahuku-nya na lii panggolu i MIRI, na ma-hanggàmaru nda tau hàmua tàka na tau akatu duna.

¹⁹Narihi hàmupa ba ngiangu la maràda telangu, welingu ba ndàdiku dànya na papaha na ma-mbuhangu pa-kambunguku dàngu na makàli mbeni.

²⁰Na tau manggàna daingu luri mbokaru dàngu wuluna; tàka na tau nduba duna na-hiru hàruha da banda da malanja-na.

²¹Jàka nggamuya na ma-pamukarungu ka na-hàrangu na mamola dàngu na paaï pa-namungu, nangala-nya na peku hàmu, na tembi dàngu na malai luri.

²²Na tau na mamàhi na-duluku pawàhi paraingu padai tanatara ma-kaborangu; na-nyungguru-ha da tindingu da pamonu-da.

²³Ka hinggilu-nya na harui, pananjarungu bàdi la kareuku.

²⁴Na tau ngànjangu dàngu majangga etina na-mbuhangu pa-paakangu anguna dàngu na-katadaku.

²⁵Na tau mayau na manda mbuhangu paràma; pameti-nanya wikina wàngu parinju etina.

²⁶Na-kanjupu-ya na lodu ba na-kanandi-nya jàka nggàraya na parinju-maana. Hauyai duna, na tau na ma-kunduhu lurina na-wuangu pada - danguma.

²⁷I MIRI nda nambuha-anja da hunggu maraku tau akatu, ri - rihi jàka nawotu wànja pawuku manda hàmu.

²⁸Na pa-hakahiingu-na na tau kambàliku nda pawai-aya; tàka na panii tau mapi hàmunya nggi - nggikina na palakara jiaya napa na pa-kataku.

²⁹Na tau tànji napi hàmungu wikina; na tau akatu nda napingu pa-makia.

³⁰Nda ningua pingu, halimu kotu jàka ndia manggàna mamàka la pa-torungu la hanggana i MIRI.

³¹Jiapa ka pamàtu wànya njara pabera na pabera, na ma-kawuku-ya na talu jiaya i MIRI.