Read Kambera PANGERANGU 22 Bible Online

PANGERANGU 22 - Kambera bible

PANGERANGU 22

¹Na tamu hàmu narihi pa-wilingu-pa welingu la banda la malanja dangu; na namu-nanda tau narihi-pa pahàmu welingu ba wuanda àmahu bara dàngu àmahu rara.

²Na tau wulu dàngu na tau mila hangia-na na pa-pahama wàda: i MIRI-ma na ma-padika ndàbanja nyuda.

³Na tau manggàna na-hinggilu jàka na-itangu pa-hanggàmaru wàngu; na tau nduba nalaku pa-ngalangu hi nanggàna-ya ura dedi.

⁴Na tau na ma-tuturu lai MIRI dàngu na ma-pawawangu wikina, naluri lànyapu, naluri mbokaru dàngu patembi-ya.

⁵Na oka kahili dàngu na pokatu la ànda tau akatu-ha; màtawa kau maraunja nuda mbuu ndàbada jàkau rinjungu pamara.

⁶Papeka-nyawa na haàtu ana la huri luri pahàmu wàna nyuna, lundu la rehi kaweda-na jiangu-ma naluri tuna nu.

⁷Na tau mila na-kuaha-ya paraï tau mawulu; na tau kei parutangu na-kuaha-ya tau mawua parutangu.

⁸Na tau na ma-hàbarungu na nda patutungu, napa namuti pa-hanggàmaru wàngu; hi lupa na-mbulangu na kuaha la pawàngu àtalu etina.

⁹Na tau hàmu eti na-pakanyuru-ya paraïna i MIRI, maa ba na-paberingu-du pangangu la tau manda patoma lurina.

¹⁰Wàngga-yawa na tau ma-mbuhangu pa-paakangu, ka pànjangu duna-nyaka na pa-lumungu, na pa-muhungu dàngu na maràngga payudi.

¹¹Na tau na mambuha-nya na patutungu dàngu na ma-mànjaku kareuku-na, jiaya na manjadi kandua hanganji.

¹²Ba na-lunggaru-ya na kambàliku tau kaputingu, mangga-nanya paraïna i MIRI ka pa-daingu opanya na papingu wàngu ma-padeningu.

¹³Na tau mayau na-mbuhangu pandàdiku la uma; napanii, “Ningu hinga la hambeli, napa na-njàkilu-duka la ngarangia,” wàna.

¹⁴Na pamandangu-na na kawini pahunda beri lambongu kahili-ya; na tau na pahàngga-na i MIRI na-hanjubulu lai nu.

¹⁵Ràka-mada da ana jàka dawunda manda jiaya, tàka na iwi namàka pa-papeka-nja ka da-panjilu-nya na hurida.

¹⁶Nggamu na ma-mbuhangu pawulu ba nawàngu pa-kapidihu tau mamila dàngu na mawua juangu la tau ma-ningungu napa la hupu njàpuna namila tanjàriku.

¹⁷Patingingu-wa, ku-papeka-nggau lii panaungu tau kaminaku manggàna! Katana-yawa na lii papekangu-nggu.

¹⁸Napa umbaha eti wànya jàkau kakomba kambuya. Nu ba tumu nu mbàda ehingu-mamuka la pawànya.

¹⁹Ku-papeka-nggaunya nuna nàhu ba rinju-nggunya ka jiaya i MIRI na ngia pamonu-mu.

²⁰Da tailu kambulu lii panaungu mbàda tulihu-nggunggau-njaka — da lii panaungu papingu wàngu dàngu da lii panaungu mahàmu;

²¹dàngu da ma-papeka-nggaunya nggàraha da ma-tubangu pa-langatàkangu. Napa, jàka paàra-nggau pekumu la pahema pa-deningu.

²²Àmbu parunggi-duya na tau mila, rukuna ba nda na-patoma; hamanai la kabungguru ma-patandangu ngera àmbu rumbaku-ya na hàku tau manda payatangu.

²³Nadu i MIRI na-kahiri-maha da palakara-da nyuda dàngu hi na-butuhu-ya na luri tau ma-kapidihu-ha nyuda.

²⁴Àmbu panggolu dàdunja na tau kàli mbeni dàngu na marengga haroputu.

²⁵Napa mukiku-dunya, dàngu ndau màka-a pawàru-nya jàka làpahu ndàmangu-muka.

²⁶Àmbu pa-ràndingu-du patanggu dukuha da wutangu tau hawiangu.

²⁷Napa jàka ndau màka pahiulu-ha, na ngia pa-katuda-mbumu papiti lerangu-ya.

²⁸Àmbu jia paleli dumunja da padira tana pambàda tuda da boku la mangilu-mu.

²⁹Mbàda itangu-muka nu tau ma-nggàhungu ba naràma paràma-na? Napa pa-wuangu paràma la uma hanganji - hanganji-ya na tau nuna, nda la uma tau kudua.