Read Kambera PANGERANGU 24 Bible Online

PANGERANGU 24 - Kambera bible

PANGERANGU 24

¹Oha-anai-ka nyuna àmbu jia wàmu-nyaka na tau akatu, dàngu àmbu rinjungu-du pa-paangu dànja nyuda.

²Nyuda ba kanandingu-danya la pambana eti dàngu la pabata-ya jàka nggàraya duna na ma-pahanggàmaru.

³Na kuru uma pa-pahada wànya manggàna dàngu kanandingu ma-jàngapu.

⁴Dàngu jàka ningu papingu wàngu, da kurungu damàtu wàngu malanja pa-wilingu ma-manandangu ihida.

⁵Na tau manggàna narihi pangaru-pa welingu la tau kapàru, na papingu wàngu narihi papingi-pa welingu la àtalu.

⁶Nadu ba ndedi pabera namemi hàmu-dupa bàdi na pambàda kaka hahangu, pa-bonjangu padangu da ma-panaungu, na-bonjangu-mbu pa-bokulu na patalu wàngu.

⁷Na manggàna lalu tanjiku-na la hangga tau nduba. Nda ana nggàrama patiki-na jàka talànga panii wànguda ma-papingi na tau.

⁸Na tau na makaka mànuya na ma-akatu, ma-pakubaru-ya wànanya tau.

⁹Nimbihu-da da kahili-na na tau nduba manjala-ha. Na tau makàli pa-akangu tau hawiangu, nda ningua mambuha-nya.

¹⁰Jàka mumbota monungu-mu daa la ma-kanggupuku, tau lamanga halawàla-kau.

¹¹Àmbu kanodaru-du pa-pahàla-ha da tau da pambàda botangu hukungu meti; pamara-ha da tau da pa-dundilu la ngia pa-tiwalu-nja.

¹²Peku-manai bau panii, “Nda ngera-anggunya,” ba wàmu. Tàka i Ala hamata-mananggau. Napi-manya dàngu na-patanda-nya ngerana na-kanandingu-mu, na-palimba-nya na tau tudana na pawunda-na.

¹³Ha ananggu, mungangu-wa manggaluangu, ba mahàmu-duya. Hama tuna na manggaluangu welingu la hibu manggaluangu ba nalàngga ba nganya,

¹⁴tuna numbu na kaminaku ba nahàmu nduma hamangu-mu. Jàkau manggàna, na-habola na lodu lurimu na manàmu-nya.

¹⁵Àmbu hama dunya na tau akatu na ma-pahamangu la paramba-nya na tau patutungu dàngu pawàhi-ya na umana.

¹⁶Nadu, jiapa-kai ka naingu njoruna na tau patutungu, nahada beli mànungu-ma duna. Tàka hauhai duda, da tau akatu na-pa-làjaru-ha paraï harui mayila.

¹⁷Àmbu nambaha-du na etimu jàka na-hanggàmaru na muhumu, dàngu àmbu hawola-du jàka nanjoru.

¹⁸Maa ba jiangu-ma duna ba naita-ya paraïna i MIRI na pawunda-mu nuna dàngu hi natàpu-ya ba akatu-ya, hi nda nahuku-anyaipa na muhumu.

¹⁹Àmbu huda-dunya jàka ndia oha-naika nyuna àmbu wàmu-dunya na tau akatu.

²⁰Na tau akatu duna nda nggàraa pamonu-na la rehi na manàmu-nya.

²¹Ha ananggu, mangàdatu-nyawa i MIRI, dàngu tembi-yawa na hanganji. Àmbu ita kiku-dunja da tau da mapapa-nja nyuda.

²²Ba ndedi nggi tuna-a mandaina na tau tungu nu ba na-ngalangu pa-làjaru, nadu na harui pa-patàka-na i Ala jàka ndia na hanganji ba nda lii makudu-aya.

²³Nakàli panii na tau kaminaku: Na hakimu nda napeku-a la pambotu hapapa.

²⁴Jàka nanjala na tau nda nanjala-a hi wàna bianyai, nuna na hakimu naràtu-nya dàngu napulu-nya paraï tau mbuu ndàbana.

²⁵Tàka na hakimu na mahuku-nya na tau njala, napa pa-kanyuru-ya dàngu patembi-ya.

²⁶Na hema na ma-tubangu jiaya na tanda pa-kandua weli etingu.

²⁷Àmbu pakuru umangu-du, jàka ndedipa mu-paloku wokamu dàngu ndedi ningumbu paluri wàmu.

²⁸Àmbu hakahii-dunya na angumu patau la manda palata hàmungu; àmbu kambàliku-mbu rukuna nyuna.

²⁹Àmbu paniidu, “Ku-papapa-manya bàdi nggàraya na pambàda wundana lai nyungga!” àmbu wàmudu.

³⁰Talànga handàka-na kulaku li la wokana dàngu woka angguru-na na haàtu tau mayau na manduba.

³¹Da paita-nggu lai nu jia-maaha da pingi rii paketu dàngu da witu. Da oka kilimbatu-na danjoru-mbuka.

³²Ba ku-hamata-haka dàngu ku-pangàda-nja nuda, ka ngala-nggunyaka yiana na lii panaungu:

³³La tàtiku dàngu la mbàpihu hakudu, la mandapu anggu-luku dàngu la ana hangahu hakudu,

³⁴namai pa-panàhaku na manjaka dàngu na pamila wàngu beri hama tuna na tau rambangu ma-katangu madàka.