Read Kambera PANGERANGU 25 Bible Online

PANGERANGU 25 - Kambera bible

PANGERANGU 25

¹Yiada yia jiaha da lii papekangu hawiangu welingu lai Halomu na pa-tulihu pakiku-da da tau la kuru umana i Hihikia, na hanganji Yahunda.

²I Ala pa-pabokulu-ya rukuna ba ningu pa-pakàpi-na; na hanganji patembi-ya rukuna da pa-kaloka-na.

³Beri hama tuna tehiku lerangu na ma-manjolungu dàngu na awangu majangga, tuna numbu na kanandingu hanganji ba nda pa-ngalangu-a pa-palàda-nya.

⁴Paili pàkuya na àmahu bara welingu la tai bàhina, hina-duka na ihi mbàngina hi na-pandoi-ya paraï tau tuku.

⁵Pa-hinggilu-ha da ma-panaungu da ma-akatu welingu la uma hanganji, hina-duka hi na-màndungu na pareta paraï mamola.

⁶Jàka hurungu la hanganji, wàngu karàda eti bàdi, àmbu pahada tau bokulungu-du.

⁷Narihi hàmupa ba paràha-nggau pahei la pangia marihi hàmu welingu ba paràha-nggau pawua-nya na pangia-mu la marihi-nggau pajangga.

⁸Àmbu renggadu pangàndi palakara la hangga ma-patandangu ngera; nadu, jàka ita-yaka na njalamu la malamiri ka hili nggiki wàmuika?

⁹Na pahilitu kanandingu la angumu, panjàpu mehaya dàngu nyuna-a, tàka na pakàpi tau hawiangu àmbu bunggahu-duya.

¹⁰Nadu, napa nyumu tau mbàdi ngaruya wànanggau tau hi naruha wàngu na tamumu lundu njàpu lurimu.

¹¹Na-kanandingu pa-paluhu na ma-nggànangu la rehi mana duna beri wua àmahu raraya la kaba julangu àmahu bara.

¹²Na hàngga tau kaminaku la tau ma-mbuhangu parongu-ya, beri hama tawuru àmahu rara jàka ndia paki àmahu raraya.

¹³Na tau pa-palewa na ma-tuturu, na-pahàmu-ya na eti ma-palewa-ya, hamana na wai maringu mànjaku la tau mamuti la woka.

¹⁴Da para - ràndika da panda pa-tutungu, hama karumangu dàngu ngilu manda pa-purungu urangu-ha.

¹⁵Na lerangu eti pa-kariangu kamàhaku na-ngalangu pawaiya tau ma-kuaha, dàngu na-uraku hàlaya na ma-pandubaku.

¹⁶Àmbu nga pada - dangudu manggaluangu; napa nalabu-du na etimu.

¹⁷Àmbu tika palua mànu la uma angumu, napa nahoda-duya hi na-karaü-nggau eti.

¹⁸Na pakàla manda tubangu pameti wànguya, hama tuna hapanda, ai palu jàka ndia pana dàkaya.

¹⁹Monunya na tau kaleka eti la rehi harui hamana ba nyama wàngu ngàndu nggoda jàka ndia pangga wàngu wihi kanjiku.

²⁰Ludunya na tau handuka hamana ba pa-kalulu-ya la rehi maringu hama-mbuna ba burinya kadoha na ma-manua-na.

²¹Jàka namanjuu na muhumu, muwua-nya pangangu; jàka namadau, muwua-nya pa-unungu.

²²Jàka tumunya nu pa-makia-dumu-nyaka hi na-pakanyuru-kau i MIRI.

²³Na ngilu nàmu diangu lupangu-ma na-papuru-nya na urangu; tuna numbu na minjiku ba lupa na-patumbu-ya na pambeni wàngu.

²⁴Ndàdiku la kabihu hindi narihi hàmupa welingu ba kahau uma dànya na papaha na mambuha-nya na pa-lumungu.

²⁵Ba ngalangu lii langu hàmu welingu la tana mamarau hamana ba unu wai maringu mànjaku jàka tamadau.

²⁶Na tau hàmu na ma-pawawa la tau akatu jiaya na mahama-nya na mata wai kanubaru jàka ndia na humuru marihaku.

²⁷Nda nahàmu la panga pa-rihingu manggaluangu, tuna numbu ba nda nahàmu-a la palalu[8] wotungu tau.

²⁸Na tau manda roputu wikina hamana na paraingu na mambàda tanyungguru tindingu ngia pa-torungu-na.