Read Kambera PANGERANGU 28 Bible Online

PANGERANGU 28 - Kambera bible

PANGERANGU 28

¹Na tau akatu na palai jiapa ka nda ningukai mayaulu-ya, tàka na tau patutungu natoru mbeni hamana na hinga.

²Jàka nanjala na banjaru, dapahi - hilungu da ma-hanggubu-nja; jàka na-manggàna na liku uru, na-torungu dàngu na-bunjuku na banjaru.

³Na ma-kuaha ma-kapidihu tau mila, hamana na ura kawalu ma-paruha ihi woka.

⁴Nggamu manda pawili-nya na uku, la ngaba tau akatu-ya; nggamu ma-karadaku-nya na uku ndubaku-nanya tau iraku.

⁵Na mola nda napi-anya tau akatu, tàka na tau ma-marubuku-nya i MIRI, na-jàngapu hàmuya.

⁶Narihi hàmupa na tau mila matànji etina welingu la tau wulu ma-mbuhangu pa-palapingu.

⁷Na bidi mini ma-karadaku-nya na uku jiaya na tau manggàna. Tàka na tau na ma-panggolu dànya na tau hiru hàru na-pamakia-ya na amana.

⁸Nggamu na mawulu ruku ba nanga matangu banda anguna dàngu na manggari pada - dangu utungu-na, da pawulu-na da-kanabu la tau mamila-nya eti na tau mamila.

⁹Jàka ndau tuturu-nya na Ukuna i Ala, na hamayangu-mbumu nalabu-nya eti i Ala.

¹⁰Nggamu ma-pamanda-nya na tau tànji ka nawunda manjala, nyuna wiki na-kanabu la lambongu kahili. Na tau ma-yahangu etina napa pa-kanyuru-ya hi naluri pa-ohangu.

¹¹Na tau wulu na-pàdangu mànu wikina ba manggàna-nanya, tàka na tau mila ma-paeti natanda-ya nggamuya duna nyuna.

¹²Jàka nayàpa kuaha na tau hàmu, nambaha eti na tau mbuu ndàbana, jàka nayàpa kuaha na tau akatu, na rayatu na kawiningu.

¹³Nggamu ma-winingu njalana nda jia utungu-ana. Nggamu mapeka-ha dàngu ma-dunjaku-nja da njalana, na-aïya paraïna i MIRI.

¹⁴Tembi mànu-yawa i MIRI, napa ka mu-paohangu. Jàka mulawa-nya Nyuna, napa mu-hanggàmaru.

¹⁵Na tau akatu na ma-kuaha-ya na tau manda patoma lurina, beri hinga ma-kangaüku-ya jàka ndia mbaruangu ma-pa-kalulukungu-ya.

¹⁶Na ma-kuaha na ma-kapidihu tau hawiangu, nda ningua kanandingu ma-jàngapu-na; na maningu kawahangu na mahuda-nya na kaputingu ndau - ndaunguma ba na-pareta.

¹⁷Na tau ma-pameti tau napàda-nya ba payaulu-ya lundu metina; nda haàtu-a ma-ngalangu papàtu-ya nyuna.

¹⁸Na tau na maluri dàngu nda nggàra nyurana napa namara. Na tau na mapingu pànga na lurina napa nanjoru.

¹⁹Na tau tungu woka ma-mbangatu paràma na-patoma na nganguna; na tau na malànja-nya na rehi nda na-patoma-a na lurina.

²⁰Na tau patutungu na-pakanyuru-ya paraïna i MIRI, tàka na tau na ma-rinjungu parengga wulu, nda namara-a welingu la hukungu.

²¹Nda nahàmu-a ba he - hekanya na tau; tàka ningumai nyuna hakimu ma-mbuhangu palii hapapa keha ka ngalangu hawutu ndui.

²²Na tau manganga eti na-rinjungu parengga wulu; nda napàda-anya ba narengga jenginya pamila wàngu.

²³Na tau na ma-wuangu lii kanyàngi la hupu njàpuna parihi pa-malangungu-ya welingu la tau na ma-wotungu anguna.

²⁴Nggamu ma-manganga la inana la amana dàngu hi nakaka-ya ba nda manjala-aya, hama biana dàngu na tau bohu hawiangu.

²⁵Pangia ngabaya na ngera wiki na-patumbu-ya na pa-lumungu; nyumu dumu murihi utungu-pa jàka mupawai lai MIRI.

²⁶Nggamu mamonu-nya na papàda eti wikina, nda ningu kanandingu ma-yarahu-na. Nggamu ma-kikungu papekangu tau manggàna, napa namara.

²⁷Nggamu ma-wuangu la tau mila nda ningua manjaka-nya. Nggamu ma-kapuda-nya na luri tau mila, napa nanggàna-ya ràtungu.

²⁸Jàka na-katangu kawaha na tau akatu, na-kawiningu na rayatu; jàka na-tàlaru na tau akatu, wàngu hawewa-naka ba na pa-kapipi na tau mamola.