Read Kambera PANGERANGU 29 Bible Online

PANGERANGU 29 - Kambera bible

PANGERANGU 29

¹Nggamu ma-pajarungu mànu jàka panaunya, jiangu-ma ngeru na-hadànjalu hi nda peku hàmu belina.

²Jàka nayàpa pareta na tau mamola, nambaha eti na rayatu. Tàka jàka tau akatu ma-kuaha, na-mayila na rayatu.

³Nggamu mambuha-nya na manggàna, na-panggaüru eti amana. Nggamu ma-panggolu dàngu kawini pahunda, hiru hàru-nanja da nduina.

⁴Jàka naeti wànya na matànji paraï ma-kuaha, na-kapingatu na paraingu-na. Tàka jàka na-pangia ngaba niha da àmahu, na-tanyungguru na paraingu-na.

⁵Nggamu ma-wotungu anguna, batangu-nanya hiru nduma wikina.

⁶Na tau akatu nahiru-ya paraï njalana, na tau tànji na-hangilu dàngu na-paohangu.

⁷Na tau hàmu napinya na ngabana na tau lamanga, tàka na tau akatu nda na-jàngapu-aya.

⁸Na tau ma-mbuhangu pa-paakangu na-kuwaru paraingu, tàka na tau manggàna na-papeku hàmuya na panggolu.

⁹Jàka ningu lii pahili la honga tau manggàna dàngu tau nduba, na tau nduba duna haroputu-ananya tàka hi nariki hi lupa na tumbu na-kanyaüru.

¹⁰Na tau tànji eti na-karaü-nya eti paraï tau mawai ilunya nabungu wai ria tau, tàka na-kahiri-ya paraï tau hàmu.

¹¹Na tau nduba nambeni memangu la hangga, tàka na tau manggàna duna na-roputu wikina dàngu na-roduku-nya na karaü etina.

¹²Jàka na-ihili-nya na pulungu kambàliku paraï ma-kuaha, da panggawi-na da-akatu hàlama.

¹³Na haàtu tau mila dàngu na ma-kapidihu-ya ningu ngia pa-pahama-da; lai nyuda pa-kadua-da nawua-nja mata paraïna i MIRI paita wàdanya na hambila-na na luri.

¹⁴Jàka na-kahiri ngera tau lamanga na hanganji, mandai ndaungu ba na-katangu pareta.

¹⁵Na lii papekangu dàngu na lii kanyàngi panaungu na-pamanggàna-ya na tau. Na ana na pa-patundu mànungu pambuha-na napa na-pamakia-ya na inana.

¹⁶Jàka tau akatu ma-kuaha, na-bonjangu na mapangga kalaratu. Tàka na tau patutungu naita-yapa tàlaru-na na tau akatu.

¹⁷Papekangu anamu, napa nawua-nggau pa-mambiru wàngu, tàka hi jiaya na panggaüru eti wàmu.

¹⁸Na banjaru na manda ngalangu londa lima welingu lai MIRI nanjadi-ya banjaru ma-kanyaüru mànu. Oha-anaka na tau na ma-karadaku la Ukuna i MIRI.

¹⁹Na haàtu ata nda napeku-a pa-papeka wànya ngaru jua. Napi-manya, tàka nda jia eti-wa-ananya.

²⁰Narihi dangupa na pa-monungu nduma tau nduba, welingu la nduma tau manda kanandi hahangu ba na-kareuku.

²¹Na ata na pa-kateli piti welingu ba bidi tauyapa, napa na-katiku watu la malamiri.[9]

²²Na tau na marengga mbeni na-pawiti-nya na pa-palumungu wàna dàngu na panjala wàna na madangu.

²³Na tau jangga eti napa pa-pawawa-ya; na tau karàda eti napa pa-wotungu-ya.

²⁴Na tau na ma-pambapa dànya na ma-manganga, karaü-nanya eti na wikina. Jàka na-patànjingu la hangga ma-patandangu ngera, napa na-ngalangu hukungu. Tàka jàka pàdi wàna bia, napa nanggàna-ya ràtungu welingu lai Ala.

²⁵Mangàdatungu kanandingu tau, paharui wànguya. Pawaiwa lai MIRI, napa napeku hàmu na lurimu.

²⁶Nadangu na tau na mahimbu wihuna ka nambuha-nya ma-kuaha, tàka na ma-wuangu matànji, didi-aya i MIRI.

²⁷Na tau hàmu nda nahàmu-anya eti na tau akatu; na tau akatu na-karaü-nya eti na tau hàmu.