Read Kambera PANGERANGU 3 Bible Online

PANGERANGU 3 - Kambera bible

PANGERANGU 3

¹Àmbu mbula-dunya nggàraya na pambàda papeka-nggunggau, ha ananggu. Unamu mànu-maya na hupu liinggu,

²ka peku malaina na lurimu dàngu ka peku luri hàmumu.

³Màtawa kau pa-daingu pawaiya dàngu pa-tuturu lai Ala hamanai la angumu patau. Namu-yawa nuna dàngu pakàpa-yawa la etimu,

⁴ka peku hàmu-nanggau eti i Ala dàngu na angumu patau.

⁵Mbuha paweli eti-nyawa i MIRI, àmbu pangia pinu duya na pingu wikimu.

⁶Patanda mànunya i MIRI la pawunda-muka mbuu ndàbana, ka peku paita-nanggau huri luri na mahàmu.

⁷Àmbu kakadu wikimu la parihi papingu welingu la tuda na maninya lai nyumu; karadaku-nyawa i MIRI dàngu marau-nyawa na ma-akatu.

⁸Na pawunda-mu nuna beri hama tuna tàda ai na ma-palànga-ya na ihimu dàngu na ma-pahayandalu-ya na eti dalumu.

⁹Tembi-yawa i MIRI bau wàngu pawotu-ha da hupu mahàmu welingu la ihi paraï-muka mbuu hàlada,

¹⁰napa da uma erimu dambinu wàngu uhu nggàndumu; dàngu da wai angguru-mu da-làndangu hi nda datoma da kanaingu ngia pa-paihi-nja.

¹¹Jàka era ràmbahu-nanggau i MIRI, ha ananggu, kataku-yawa nuna ba panamu haha-nanggau, dàngu àmbu nahuda wànya na etimu nu ba na-papeka-nggau.

¹²I MIRI duna na-ràmbahu-ya na tau pambuha-na, hama tuna na haàtu ama na ma-ràmbahu-ya na ana panamu-na.

¹³Oha-anaka duna na tau ma-manggàna dàngu na ma-jàngapu kanandingu-na.

¹⁴Na utuna narihi bokulu-pa welingu la àmahu bara; narihi pawilingu-pa welingu la àmahu rara.

¹⁵Na manggàna narihi pawilingu-pa welingu la watu matika pa-pawilingu; mbuu ndàba-naka na parinju etimu nda jia hama-ananya.

¹⁶Na manggàna nawua-nggau malai luri, pawulu wàngu dàngu tembi maraku.

¹⁷Na manggàna na-pahàmu-ya dàngu na-papeku-ya na lurimu.

¹⁸Na tau na-mapaundungu la manggàna napa naera-nya na luri ma-palangatàkangu dàngu na-pa-ohangu.

¹⁹I MIRI na-padika-nya na tana wàngu manggàna-na; na-wàlahu-ya na awangu la pangia-na wàngu eti diha kanandingu-na.

²⁰Wàngu pinguna natuha da matawai daa la tana wàka hi na-pawiti-nya pa-lulungu na waina hamanai na karumangu la awangu na-paliri-nya wai na pinu tana.

²¹Jia ba tuna, pa-undungu-wa la manggàna dàngu la pa-dihangu manyanga hàmu, ha ananggu! Àmbu jia pahàla-dumunya,

²²napa na lurimu na àhalu — na manandangu dàngu na-pahàmu eti.

²³Napa ulaku mambiru dàngu ndau tunjuru-a.

²⁴Ndau mangàdatu-a jàkau laku pa-katuda, dàngu ukatuda minjalu lundu kanjupu-ya na rudungu.

²⁵Àmbu jia mangàdatu-dumunya na hanggàmaru na matàka harabànda-nggau beri hama tuna làpuru, hi na-làndahu-nja da tau akatu.

²⁶I MIRI napa namangga-nggau. Nda napuli-anggau pa-hanjubulu la lambongu kahili.

²⁷Jàkau màka pawunda-ya na mahàmu la tau ma-kalana-nya na hàmumu, àmbu hinggilu-dunya la pawunda-ya nuna.

²⁸Àmbu paràha-dunya na angumu pa-patiangu lupa tàkanya na lodu haromu, jàka peku ndula bia-munyai la lodu nàhu.

²⁹Àmbu ngga - nggàradu pa-pakaka-mu la pa-parunggi wànya na angumu na ma-ndàdiku lihinggau dàngu na mawaikau nyumu.

³⁰Àmbu palumu dànya la manda pa-latangu na haàtu tau na manda ana wundana ma-akatu lai nyumu.

³¹Oha-naika nyuna àmbu jia wàmu-nyaka na tau na ma-pajanggilu dàngu àmbu tundu-dunya.

³²Nadu na-karaü-nya eti i MIRI na tau mawunda ma-akatu, tàka na-panggolu dànya na tau ma-patànjingu la lurina.

³³I MIRI naràtu-nya na uma tau akatu, tàka na-pa-maringu-ya na uma tau ma-karadaku-nya.

³⁴I MIRI na-karaü-nya eti na tau jangga eti, tàka hi na-pamaringu-ya na tau karàda eti.

³⁵Na tau manggàna na-bonjangu pawuwa na tamuna, tàka na tau nduba duna pa-paakangu-ya.