Read Kambera PANGERANGU 30 Bible Online

PANGERANGU 30 - Kambera bible

PANGERANGU 30

¹Yiada-haka da kareuku patiki-na i Angguru anana i Yaki welingu la Maha: “Kuonja, ou Ala, kuonja! Njàpu-nanyaka na kapàru-nggu!

²Kunduba hama tuna banda; nda ningu kanandingu-nggu ma-jàngapu.

³Ndedima ku-papekangu pa-manggàna, nda hawutu-ma papinggu rukuna i Ala.

⁴Ngga tauya na mahei purunya na awangu? Na-handàkangu-ka nyuna pawunggu wanya limana na ngilu, dàngu na-kawuhuku-ya na wai la kalembina, jàka ndia natunya padira-na na pa-nggubulu awangu? Nggamu-yaka nu nyuma, dàngu nggamuya na anana? Jiangu-ma bau pinya!

⁵I Ala na-patutu-nya na paràndi-naka. Nyuna beri hama temingu-ya la tau mbuu ndàbana da mamai pamaü lai Nyuna.

⁶Jàkau bonjaya nggàraya na papeka-na Nyuna, napa nahàngga-nggau dàngu na-paloha-nya ba tau kambàliku-kau,” wàna.

⁷“Dou Ala, ku-kamahi-nggau ba ndedipa kumeti, ka muwua-kingganja yiada ba dua batada.

⁸Ka àmbu jia tikinggu kareuku ma-kambàliku, dàngu àmbu puli-dungga la pamila jàka ndia la pawulu. Wua-nggawa ana ràka nduma-anggu.

⁹Nadu, jàka kuwulu, nda nggàra kuihi wà-anggau Nyumu raï hi wànggu bianggau. Dàngu jàka kumila, raï hi ku-manganga hi ku-pakajari-ya na tamumu Nyumu,” wàna.

¹⁰Àmbu pawauya na haàtu ata la hangga mirina, napa naràtu-dunggau dàngu hi panjala-kau.

¹¹Ningu tau ma-ràtungu amana dàngu manda pawilingu inana.

¹²Ningu tau makaka wikina ili-nanya hi dira marihaku biayai.

¹³Ningu tau makaka wikina ba dira hàmuya — kanjupu hàmu ailulu-ya!

¹⁴Ningu tau mahimbu luri wàngu mbana etina; nda da-paaï dàngu na-kapidihu-ha da tau mila dàngu tau lamanga.

¹⁵Na tau ma-palamuji tau madua-ha da anana; da tamuda pa-kadua-da: “Ndumanggu nyungga!” wàna. Ninja ba patuda da manda pingu dirada:

¹⁶na pangia mameti, na kawini manda eranya na habola, na tana màdu na ma-kandànga-nya na urangu, dàngu na epi na ma-làmbatu la nggi - nggini.

¹⁷Na tau ma-paakangu amana jàka ndia inana da mambàda kaweda,[10] ràka-mana jàka ndauhaya la hambeli ka na-nàhiku-ha nggangga da wua matana dàngu ka nanganya mbaku tehiku na metina.

¹⁸Ninja ba patuda da malalu haruiha la patama la kanandingu-nggu:

¹⁹na mbaku tehiku ma-hawurungu la kiri awangu, na ularu mabei la pinu watu uturu, na kapalu mali la padua tehiku, dàngu da madua da bidi tau da ma-talànga tumbu pa-mbuhangu-da.

²⁰Yiana-yaka na màhina na haàtu kawini na manda tuturu la mini leina: ba nahàla-ka pa-njuraku, ngangu-nanyaka hi na-podahu ngaruna, hàlaka, “Nda nggàra-a pawunda-nggu!” hi wàna.

²¹Ninja ba patuda da ma-harui la pa-kataku-ha tau pa-nggubulu awangu:

²²na haàtu ata na manjadi maràmba, na haàtu tau nduba na mangala ndàbanja da parinju-na,

²³na haàtu tau kawini mapeku pa-mangoma, làti duna ba nda ningua tau mambuha-nya, na haàtu ata kawini mawàhi-ya na mandapu-na na ràmbuna.

²⁴Yia la pinu tana ninja ba patu batada da banda kudu, tàka dira pinguha, jia-duha:

²⁵Da kahoduku, banda manda kapàru-ha, tàka da-payemangu pangada la wula wandu.

²⁶Da palànduku, da ma-kapàki-a, banda ma-lamanga-ha, tàka da-pandoi bia pangia-da la tandula watu.

²⁷Da kabala, banda manda ningu maràmbangu-ha, tàka hi laku pajuru hàmungu biada-nya.

²⁸Da kumbu laï, banda payàpa wàngu limaha, tàka ni bianja la uma hanganji.

²⁹Ninja ba patuda da mapalii eti jàka tàngaru-ya na huri panggada, jia-duha:

³⁰Da hinga, banda marihi kapàru la hongada da bandaka mbuu ndàbada dàngu nda ningua pa-mangàdatu-da;

³¹da bumbu, da manu wulu da mapangga tanganjiru, dàngu na haàtu hanganji la hangga rayatu-na.

³²Jàka ruku ndubamu hiu pa-kakangu wàngu jangga etimu la pawunda lii ma-akatu, mu-rimangu!

³³Nadu, jàka mu-kolukungu huhu, mu-ngalangu minatengga. Jàka mupalu uru tau na luhu na riana. Jàka muwuda ma-karaü, mu-tamangu pahànggangu.