Read Kambera PANGERANGU 31 Bible Online

PANGERANGU 31 - Kambera bible

PANGERANGU 31

¹Yiada-ha da kareuku da patiki-na na inana na Lemualu na maràmba Maha ndumana na anana,

²“Dou na ananggu, na wuranggu, pa-paana-nggu na hemana na hamayangu-nggu. Nggàra bàdi papanii-nggunggau?

³Àmbu pambuta-ya na àtalu-mu jàka ndia àmbu hàbaru-dunya da pariimu la kawini. Mbàda danguka maràmba ma-kanabu ruku kawini.

⁴Ngàdaya ha Lemualu! Na unungu angguru dàngu na malumbangu paunu ma-maüku nda ràka-ana la hanganji.

⁵Nadu, jàka na-unungu ma-maüku na maràmba, nambula-nya na uku dàngu nda na-ihili-anya na nduma tau lamanga.

⁶Da paunu ma-maüku jiaha da ndumada nyuda da ma-mangonangu dàngu da ma-hawina.

⁷Hi da-unungu ka peku maromba-danya na milada dàngu na handuka-da.

⁸Kahiri-hawa nyuda da manda peku pa-kahiri wikida. Opa-nyawa na ngera mbuu ndàbana na tau manda payatangu.

⁹Parukangu-ma ndumada nyuda dàngu njadiwa hakimu ma-padeningu. Opanya na ngaba tau mila dàngu tau pa-kapidihu,” wàna.

¹⁰Na papaha na ma-nggàhungu nda namuda la pahunggu-ya; narihi pawilingu-pa welingu la itangu mbaraliangu.

¹¹Na mini leina nda nggàra-a majapu-nya, ba namonu-dunya nyuna.

¹²Nda ana wunda-mana manjala hanggangu la mini leina; la ngala lurina nawunda mànunya mahàmu.

¹³Na-maràna pa-pauhingu rami dàngu ruu ihi mbimbi hi na-karinggatu paràma ba na-tinungu.

¹⁴Na-palaüngu pangangu welingu la mamarau, hama tuna na pawàda da kapalu danggangu.

¹⁵Na-hadangu la mbaru hada rudungu la pa-paloku-nja pangada da ihi kuru umana, dàngu hi napabe - berinja paràma da-papalewa-na.

¹⁶Nahimbu hau woka, hi nadingi-ya; napoka hau woka angguru welingu la pangala wikina.

¹⁷Na-hawanjiru wikina la paràma pa-mbangatungu.

¹⁸Napinya pa-wilingu-da mbuu ndàba da paràma-na; lupa la padua-ka rudungu ba naràma.

¹⁹Na-ndataru lulu kamba hi na-tinungu hinggi.

²⁰Nda na-kutuhu-a la manda patoma lurina; nahàmu-nya eti na tau makarai-ya pa-ndulangu.

²¹Nda na-mbimbitu-anya na tàkana na wula maringu, ba mbàda ningu hahangu-duka kalembi mamitu nduma ihi umana.

²²Nyuna wiki ma-hikungu topu lata wihina; da pakina tera linangu rara atu ma-kanjupu pa-wilingu-ha.

²³Na leina tau hungaya — haàtu liku uruya la honga liku uru paraingu.

²⁴Na-pandoi paki dàngu boru bànggi hi nadangga-nja la tau danggangu.

²⁵Nyuna pa-mahumbarungu-ya dàngu patembi-ya; dàngu nda na-mbimbitu-anya na lodu na manàmu-nya.

²⁶Na-mandangu na paniina; na-manggàna na kareuku-na.

²⁷Na-maràna mànu ba naràma dàngu na-hamata-ya na pa-patoma wàna na ihi umana.

²⁸Na-pawili-nya paraï da anana, dàngu nawotu-nya paraïna leina.

²⁹“Dadangu da kawini hàmu,” “tàka nyumu murihi halawàla-pa pahàmu welingu lai nyuda mbuu ndàbada,” wàna na leina.

³⁰Na mata ma-hawelaru nda pawai-aya dàngu na manandangu napa nanjàpu; tàka na kawini ma-karadaku-nya i MIRI ràka-mana ba na-ngalangu wotungu.

³¹Palimba-nya na hàmu-naka; nyuna kawini ràka patembi-ya la nggi - nggini!