Read Kambera PANGERANGU 5 Bible Online

PANGERANGU 5 - Kambera bible

PANGERANGU 5

¹Patingi-nggawa, ha ananggu! Katana-yawa na lii panaungu manggàna-nggu dàngu na kanandingu ma-jàngapu na pa-papeka-nggunggau,

²ka peku pimunya nggiki hamana bau luri panggolu dàngu bau pa-kareuku tau pingungu.

³Na kawini ànga,[1] na kareuku-na hama làngga manggaluangu-ya, tàka da papanii-na da-pawànda eti,

⁴na nyuna jàka na-làpahu-ka mbuu ndàbana, na ma-ndàdiku jiaya na puri paita dàngu na mayila-maaka.

⁵Nyuna na-ruruhu-kau papuru la pangia tau meti; na ànda ngia palina ma-hanggangu la parai tau metiya.

⁶Nda na-padaingu-a la ànda na ma-hanggangu la luri; nda napàda-anya ba mbàda hiliru-naka welingu la ànda nuna.

⁷Jia ba tuna, oi anakeda, patingi-nyawa na papanii-nggu, dàngu àmbu jia talarahu-munya.

⁸Wiliru-nyawa na kawini tungu nu! Àmbu hangiri-mbuya na umana.

⁹Jàkau panggolu dànya nuna na kawini, napa na-mbulangu na patembi wàngukau dàngu na lurimu ba bidi tau-kaupa naramba-nya tau manda pingu pa-panamu la anguna.

¹⁰Da pawulu-mu nangaa pambuta-ha tau hawiangu, dàngu da wunda njilimu namangu-nja tau panda tandamu.

¹¹Tunaka nu hiu hali uramu jàka nalàlu-ka na ihimu ba nangaa pambuta-ya wai mahidu.

¹²Tàka hiu panii, “Ai, ka nggikina hi kuhuda-nya na lii panaungu? Ka nggikina hi nda kubihu jàka hàngga nàrungga?

¹³Nda ku-mbuhangu parongu-ha da nggurunggu dàngu nda kubihu patundu-nja nyuda.

¹⁴Nda pambuti-nya hi jia nda ningu bia wilinggu[2] la matana i madangu,” wàmu.

¹⁵Jia ba tuna tuturu-wa la papaha wikimu dàngu kau paora-nya na mbuhangu-mu la nyunama-a.

¹⁶Nda ningua linguna lai nyumu bau pangangu eti pakati puhu dàngu tau nda papaha-mu.

¹⁷Na pangangu eti pakati puhu tungu nu mbulungu ndumamu nyumu dàngu na papaha-amu, nda dàngu tau hawiangu-a.

¹⁸Jia ba tuna màtawa kau pa-ohangu dàngu papaha wikimu; pangangu eti pakati puhuwa dàngu bidi kawini na pambàda pahamu —

¹⁹nu na bidi kawini manandangu na ma-pahalimu bai hawurungu. Màtawa na manandangu-na ka na-pawiti-nya na-mangànjilu-munya dàngu nambuha weli eti-nanggau ka jiaya na-mataru-munya.

²⁰Nggàra linguna bau mbuhanya na kawini hawiangu, ha ananggu? Nggàra nduma-naka bau panggolu-danya na kawini ànga?

²¹I MIRI naita hàlaya napawu - wunda-naka na tau pinu tana. La nggini biaya nalaku ningu na tau pinu tana hamata-mananya paraïna i MIRI.

²²Na njala tau akatu beri hamana na kambia na ma-hanggàpitu-ya nyuna wiki.

²³Nyuna nameti-ma ba nda na-kataku lii panaungu. Na nduba nda halindingu-na jiaya na mangàndi-ya la làjaru.