Read Kambera PANGERANGU 6 Bible Online

PANGERANGU 6 - Kambera bible

PANGERANGU 6

¹Ha ananggu, talànga wanguna hiu pa-njanjingu bia la angumu la patanggu mbayaru-ha da wutangu-na.

²Raï hi mbàda kàna biamu la hiru kareuku wikimu dàngu hi na-pahandànga-kau paraï panjanji wikimu.

³Jàka deningu-na nu, ha ananggu, ninggauka nu la limana nuna na tau. Tàka yiana-ya na ànda luhumu: urengga palaku tomaya na tau nuna, kau kamahi langatàka-manya ka nabihu la pa-pahàla-kau.

⁴Àmbu lua kàdi pa-katuda, dàngu àmbu hangahu-mbu.

⁵Pamara-wa wikimu welingu la kambia nuna beri hamana na ma-hawurungu jàka ndia na bai hawurungu ma-pahàla wikina welingu la ma-patamangu.

⁶Na tau mayau eti lupangu-ma na panauya na huri luri kahoduku ka na-papekangu welingu lai nyuna.

⁷Da kahoduku nda ningua liku uruda, nda ningua ma-kuaha-ha jàka ndiakai ma-hamata-ha,

⁸tàka la ngala rehi muti da-kangutungu bàlada nduma wula rimbangu.

⁹Lundu pirangu-mapa nu na tau mayau eti ba na-mahuru pangalangu? Lundu pirangu-mapa hi na-mbuhangu pahada-ngu?

¹⁰Na-mandapu hangoturu la pa-hangahu, hi napanii, “Ai, màta kuluu mahuru hawutu, ba tàtiku-manggu-nyapa,” wàna.

¹¹Tàka ba talànga mahuru-na, jengi-nanyaka majapu-nya, dàngu na pamila wàngu na matàka hama tuna tau rambangu mambinu madàka-na.

¹²Na tau akatu, na ma-katadaku nakakòlulu la nggi - nggini.

¹³Na-pakamàdikungu mata ba na-paitangu tanda la pa-panyonga tau.

¹⁴Na kanandingu nda hàmuna nambinu wàngu pawuku akatu dàngu na-patumbu-ya na pa-palumungu wàngu la nggi - nggini.

¹⁵Mbuu ndàbada nuda na-pawiti-nya na hanggàmaru la wikina na matàka harabàndangu, hi na-làjaru ailulu.

¹⁶Ninja pihu batada da pa-karaü-na eti i MIRI dàngu da panda màtana: Na ngànjangu, na ngaru ma-kambàliku, na lima pameti tau nda ningu njalangu, na kotu mawuku-ya na lii ma-akatu, da wihi ma-nyanyaru la ma-akatu, hakahii ma-nutakungu pa-kambàliku, dàngu tau ma-patumbu-ya na pa-muhungu dàngga angu.

²⁰Ha ananggu, palaku-yawa na pa-paràha-nanggau na amamu, dàngu àmbu mbula-dunya na pa-panau-nanggau na inamu.

²¹Ngàda mànuha da kareuku-da dàngu pakàpa-maha daa la etimu.

²²Da panau papekangu-da dalonda limakau la ànda ngara ngia, damangga rimanggau la rudungu, dàngu da-paita-nggau ngerangu la rehi pawàla-mu.

²³Da ngerangu welingu la ina amamu beri hama palita ma-hambila-ha; na kanyàngi-danggau paita-danggau paluri hàmu wàngu.

²⁴Tuna nuduka ba da-pamarau-kau welingu la kawini ànga, welingu la pamandangu ma-paupahungu-da da papaha tau hawiangu.

²⁵Àmbu na-pakabàliku-kau paraï na manandangu-da, àmbu na-kameni-kau paraï wua matada da ma-panggeli.

²⁶Na kawini pahunda napeku la pahewa wànya uhu hau kawinga, tàka na njuraku dànya na papaha tau hawiangu lupangu-ma pa-palimbangu wàngu luriya.[3]

²⁷Napeku nu na tau la pababa epi dàngu nda mutungu-na na kalembi-na?

²⁸Napeku nu na tau la paliti wàla epi hi nda na-mutungu biai na wihina?

²⁹Nuna nu hama harui-mana la pa-katuda dànya na papaha tau hawiangu. Nggamu ma-palaku-ya nuna nda jia pahàla-ana welingu la hukungu.

³⁰Jàka na-bohungu pangangu na tau jiapakai ka ruku rimbangu-na, jianguma ba payudi-ya.

³¹Tàka jàka yàpa-yaka lupangu-mbui na-mbayaru beliha ba na-papihu hama danja, hi lupa nawua hàlaha da maninja-ka la limana.

³²Tàka ka nggiki-naika duna na ngerana na tau na ma-njuraku? Nyuna-duna paruha-nanya wikina! Kanjupu ndubaya!

³³Jiangu-ma ba pa-mayila-ya dàngu ba paaka-nya. Na-iraku wànyaka na tamuna lundu nu - nu.

³⁴Nadu na pawunda-na nu natunya pawuhu wàna na mini leina nuna na kawini, hi lupa kanjupu mbumbaru-ya na ma-karaü. Tàka jàka na-kulingu patungu kiringu nda jia paaï-anapa.

³⁵Nda peku-ana nyuna la pa-pamanda wànya ndui; jiapa ka pirada da pawua juanya nda na-ngalangu-mbu pa-pawadaru-ya na karaü etina.