Read Kambera PANGERANGU 8 Bible Online

PANGERANGU 8 - Kambera bible

PANGERANGU 8

¹Patingingu-wa! Warangu-nanya na manggàna, tungu-nanya lii na kaminaku.

²Nyuna na-ndolaku la pinuda da tandula la hingi ànda, dàngu la pa-hàmburu ànda.

³La pindu bokulu la ànda tama la paraingu, lai numaya na ngia parongu-ya na talia nggoruna.

⁴“Ha, nyimi banjaru tau pinu tana, kuwara-nggai nàhu; nimbihu-mi maluri la pinu tana, tanaü-ya na lii kamahingu-nggu!

⁵Nyimi mandedi njara kabu ruku, papekangu-wa ka na-dàkatu na kanandingu-mi; nyimi manduba, papekangu-wa kai kapata rukumi.

⁶Katana-hawa da papeka-nggu, nadu mbuu ndàbada ba ma-paàndangu-ha dàngu ma-pawilingu-ha.

⁷Da papeka-nggu ma-tubangu hàlaha, maa ba ku-karaü-dunya eti na kambàliku.[4]

⁸Da papeka - papeka-nggu da patutungu ndàba, nda hauma ma-panjingu-njàngangu jàka ndia manjala.

⁹La tau ma-halimu kotu, ma-deningu-ya na papeka-nggu, la tau ma-kaminaku, ma-paàndangu-ya na papeka-nggu.

¹⁰Pawili-nyawa na lii panaungu-nggu rihi welingu la àmahu bara, papingi-yawa na pingu rihi welingu la àmahu rara.

¹¹Nyungga yia kaminaku, kurihi pa-wilingu-pa welingu la mbaraliangu; nda napeku-a la pa-pamenja wàngga nggàra bia parinju-mu.

¹²Nyungga yia kaminaku-ka; lai nyungga ninya na kanandingu ma-jàngapu, na manggàna dàngu na papingu wàngu.

¹³Na tembiya i MIRI na ihina jiaya karaü-nya eti na ma-akatu; nda kumbuha-nya na ngànjangu dàngu na abungu. Ku-karaü-nya eti na huri akatu dàngu na kareuku kaputingu.

¹⁴Nyunggama ma-pajuju. Tàka nyunggamai ma-palaku-ya. Ku-halimu kotu dàngu ku-àtalu.

¹⁵Kundula-ha da maràmba la pa-palaku-ya na pareta-da, kujura-ha da ma-kawaha la pa-pandolaku-ya na ma-padeningu.

¹⁶Rukuna na hàmunggu da ma-pangora dàngu da tau bokulu dayàpa pareta dàngu da-palaku-ya na pa-deningu.

¹⁷Kunamu-ha da mambuha-ngga nyungga; na-mahimbu-ka nyungga, napa nahunggu-ka.

¹⁸Lai nyungga ninguma pawulu wàngu dàngu patembi wàngu hamanai na luri mbokaru.[5]

¹⁹Na-pangala-mu lai nyungga narihi-nyapa na àmahau rara ihi mbàngina; narihi pa-wilingu-pa welingu la àmahu bara weli wingungu.

²⁰Kulaku tundunya na ànda mola, kupangga kikunya na ànda tànji.

²¹Na tau manamu-ka, ku-pawulu-ya; kupinu wànya banda malanja na umana.

²²Ma-kawungangu-ka ba na-padika-ngga i MIRI, nyungga-maka kawunga ruku limana la rehi la handàka-na.

²³Nyungga nawulu-ka welingu la pa-kiringu-na, weli mulangu, ba ndedi-mapa na-padika-nya na pinu tana.

²⁴Kudedi, ba ndedipa padika-nya na tehiku lerangu, ba ndedipa daluhu-ha da mata wai.

²⁵Kudedi ba ndedipa pa-ndolaku-ha da palindi-ka, ba ndedipa pa-ndingiru-ha da tandula-ka,

²⁶ba ndedipa i MIRI na-padika-nya na pinu tana dàngu na maràda-na, langatàka ba ndedi-mapa Nyuna na-padika-nya na kawunga kabànda tana.

²⁷Ku-hakahii-nya ba wàlahu-ya na awangu, dàngu ba walaya na kuru awangu la pinu tehiku,

²⁸ba na-bànjalu-ya na karumangu i MIRI la lumbu awangu, dàngu ba na-bunggahu-ha da matawai-na na tehiku lerangu,

²⁹ba na-pareta-ya na wai tehiku ka àmbu napangga-duha da padira-na. Ba na-bànjalu-ya na latana na tana nimanggai duku lai nu.

³⁰Ningga la karaha-na beri ana pambuha-nangga, hau lodu - hau lodu nyungga-maka pingi pola pa-ohangu-na; naingu-mana ba ku-pajulu la hanggana.

³¹Ku-hanggela hawola la pinu tanana Nyuna, dàngu kungera-nya na pa-ohangu la honga tau pinu tana.

³²Jia ba tuna patingi-nggawa, ha bidi tau! Tundu-nyawa na pa-paita-nggunggau ka peku pa-ohangu-mu.

³³Kataku-wa panaungu dàngu manggàna-wa, àmbu pa-halimu-duya.

³⁴Oha-anaka na tau ma-patingi-ngga na ma-uhuku nimbihu lodu ba na-patiangu la pindu umanggu, dàngu na madai mànu la pindu bokulu ngia pangiangu-nggu.

³⁵Nggamu mangala-ngga, ngalangu-nanya luri, lai nyunaya na ngia pa-orangu-na i MIRI.

³⁶Nggamu manda ngalangga, parunggi-nanya wikina; na tau ma-karaü-ngga eti, mbuhangu-nanya meti,” wàna.