Read Kambera PANGERANGU 9 Bible Online

PANGERANGU 9 - Kambera bible

PANGERANGU 9

¹Na manggàna nawulu-ka umana, dàngu na-patinja-njaka da pihu mbungu kambaniruna.

²Mbàda rupu-naka banda pambabu wàngu, na-paloku wai angguru dàngu na-payemangu pangangu.

³Da kawini ma-paloku na-palewa-ha pawa - wara welingu la pangia majangga la paraingu,

⁴“Nggamu manda ndàmangu, maiwa nàmu!” wàda. Hanggangu la manda ningu eti diha kanandingu napanii na manggàna,

⁵“Maiwa kai nganja da pangangu dàngu kai ununja da angguru pa-paloku-nggu.

⁶Laku wàru-nyawa na nduba, ka peku luri pa-ohangu-mu. Tundu-nyawa na ànda tau pingu,” wàna.

⁷Jàkau paita-nya njalana na tau manda bihu ka ajaru-ya, napa nariki-nggau. Jàkau mbeninya na tau akatu, napa natola pa-iraku-kau.

⁸Àmbu paaka-nya na tau manda bihu ka ajaru-ya, napa na-karaü-nggau eti. Tàka jàkau paita-nya njala na tau manggàna, jiangu-ma natunggau wilimu.

⁹Jàkau panaunya na tau manggàna, napa na-bonjangu na manggàna-na. Dàngu jàkau papeka-nya na tau ma-karadaku-nya i Ala, na-bonjangu na pinguna.

¹⁰Ka peku manggàna-na, na ma-wungangu lupangu-ma bàdi na tau na-pamangilu-ya la patembi-ya dàngu pa-karadaku-nya i MIRI. Jàkau tandaya i Mahupu-matua, napa ungalangu kanandingu ma-jàngapu.

¹¹Na manggàna napa nawua-nggau malai luri.

¹²Jàkau mangunya na manggàna, nyumu wiki ma-utungu. Tàka jàkau jukaru-nya na manggàna, hili nyumumai marunggi.

¹³Na nduba beri hamana na kawini karepaku manda ndàmangu dàngu nda makia.

¹⁴Na pangia-na la pindu uma-nanya jàka ndia la pindu bokulu paraingu-ya.

¹⁵Welingu lai nu hi nawara-nya na tau na manàhu-nya. Na pamanda-nya na tau tànji eti,

¹⁶“Laku li pàku, ha nyimi mandedi ndàmangu!” wàna. Tàka la tau manda ningu eti diha kanandingu napanii,

¹⁷“Na wai pamanganga narihi mànjaku-pa, dàngu nangaa kawiningu narihi-pa palàngga,” wàna.

¹⁸Da ta - tauka da pauhu-na nda dapi-anya jàka nggamu malua tomaya ba hunggu-nanya na hupu njàpu lurina lai nu; dàngu nyuda da mambàda tama la umana, ninjaka nàhu la parai tau meti.