Read Kambera MA-PABOBARUNGU 1 Bible Online

MA-PABOBARUNGU 1 - Kambera bible

MA-PABOBARUNGU 1

¹Da kareuku la mbuku yiana welida lai Ma-tanjiku Kanandingu na anana mini i Ndautu, na mahilu-ya i Ndautu pa-hanganji la Yeruhali.

²Napanii i Ma-tanjiku Kanandingu: Mbutana mbuu ndàbana kahewa ju - jua-ma-ana dàngu nda ningua linguna! Kahewa-ma-ana na luri mbuu ndàbana nda ningua ihina.

³Taràma la ngala lurinda, lundu mihi wai hanggobungu-nda. Tàka, nggiyaka na ihina na pa-hamemu wànda?

⁴Wudaku wànaka na handalaru, molungu-nanyaka na handalaru, tàka na pinu tana nda na-pajilungu-a.

⁵Nahunga-mapa na mata lodu dàngu natama-mbupa. Dàngu njilina nabeli-ya la pangia-na, hàlaka hi nahili hunga beli.

⁶Na-hapuputu hu luru na ngilu, hàlaka hi na-hapuputu hu dia; na-kapili punjilu, hàlaka hi nahili beli.

⁷Mbutada da luku da-lulungu la tehiku, tàka nda nambinu ndokua na tehiku. Na waina nabeli la katiku luku, tàka hi nahili lulungu beli.

⁸Mbuta-naka nuna hoda bia-ndanyaka dàngu dira matiki-ya nuna na hodanda. Da matanda nda dira ndokuda pa-tàngaru; da kahilu-nda nda ana mahobi-da pa-patingingu.

⁹Nggàraya na mambàda njadi, napa nahili njadi beli. Nggàraya na pambàda wunda, napa pahili wunda beli-mayai. Nda ana nggàra-a mabidi yia la pinu tana.

¹⁰Ningu mapanii, “Tàngaru yiana mabidi-ya!” wàna. Tàka nuna nu mbàda ninyaka duna ba ndedi tadedi.

¹¹Napa na tau nda nanamu-ayapa na manjadi la rehi na ma-làpahu. Tuna numbu na manjadi la rehi na nàhu dàngu la rehi manàmu-nya, napa nda na-pangàda-anyapa paraï da tau la rehi na manàmu-nya.

¹²Nyungga, i Ma-tanjiku Kanandingu, ma-pareta la Yeruhali ba hanganji Ihirailu-ka.

¹³Kita-mananya na etinggu pa-manginjiru-ya dàngu pa-papeka-nya mbuu ndàba na manjadi la pinu tana yiana. Na uranda pa-panduma-nanda i Ala kanjupu pa-hawina wànguya.

¹⁴Mbàda ita-nggunyaka mbuu ndàbada da pawunda tau la pinu tana yiana. Tubangu, wàmuwa mbuu ndàbada nuda kahewa-ma-ada, hama tuna na pa-mukarungu pa-kehangu ngilu.

¹⁵Na ma-kaleka nda peku patànji-aya, dàngu na manda ninya, nda peku diha-aya.

¹⁶Kupanii la etinggu, “Nyungga duku ku-manggàna, kanjupu rihika pa-manggàna welingu la mbuu ndàba da tau ma-pareta la Yeruhali ma-mangilu-ngga nyungga. ku-kangutungu padangu ihina na manggàna dàngu papingu wàngu,” wànggu.

¹⁷Ba tuna kita-mananya na etinggu la papinya na pahilitu-na na pingu dàngu na nduba, na manggàna dàngu na kambànga. Tàka na ma-lohangu nyungga duku hama tuna ma-kehangu ngiluka.

¹⁸Nadu hama huka danguna na manggàna-nda, hama huka mangginggitu-na na etinda. Hama huka danguna na papinda, hama huka dangu-manai na handuka-nda.