Read Kambera MA-PABOBARUNGU 10 Bible Online

MA-PABOBARUNGU 10 - Kambera bible

MA-PABOBARUNGU 10

¹Na meti walabau napawau-ya na mina mbii kati hau boti, na hakudu nduba na-pamuna-nya na manggàna ma-tanjiku.

²Ràka-mana jàka nawunda mahàmu na tau paeti, dàngu nawunda ma-akatu na tau nduba.

³Na ndubana na ndudumbu jàka nalaku-ya. Dàngu na panii ndàbaya la tau na àngana.

⁴Jàka nambeni-nggau maningu kawahangu, àmbu karaidu pànjangu paràma. Jiapa ka na-bokulu na njalamu, pa-jàmangu-kau jàkau mambiru dàngu upa-torungu.

⁵Ninya na hili hau akatu paita-nggu la pinu tana, jiaya na nda pa-deningu-da da maningu kawahangu.

⁶Na tau nduba ba wuanya wai ngaba ma-manàra, tàka na tau na ma-ngiangu la ngora nda nggàra-a pangala-na.

⁷Mbàda itangu-ngguka tau ata da mali la njara tàka da tau bokulu da li la wihi hama tuna tau ataha.

⁸Nggamu maàki lambongu, napa na-kanabu lai nu; nggamu ma-nyungguru kangeli napa nakati-ya kataru mbana.

⁹Nggamu maràma la pabera watu, napa na-pamanua-ya watu. Nggamu mabika ai, napa na-hanggàmaru.

¹⁰Jàka nabuli na kabela-mu tàka hi ndau deliya, jianguma ba rihi dira matiki-kau bau ràma wànya. Uwànyawa na kanandingu hàmumu, dàngu upatiki hahangu paku.

¹¹Jàka na-pakati na kataru ba ndedi pa-pamopu wànya hamayangu, ka nda ningu-apa linguna na ma-pawangu kataru.

¹²Rukuna na patiki-na na tau paeti tàka hi tembiya, tàka na tau nduba na-tàlaru ruku kareuku wikina.

¹³Na-pakiringu pa-kakòlulu pakàli wàngu, la hupu njàpuna na-pakareuku ma-katobangu.

¹⁴Deningu-mana, ba nadangu kareuku-na na tau nduba. Na rehi na manàmu-nya nda tapi-anya nyuta mbuu ndàbanda. Nda ningu-a na-mangalangu panyura-ya na manjadi jàka taliu-ndaka.

¹⁵Mbulungu tau nduba-a manda pinya na ànda la umana, nda na-pànjangu paràma dira matiki.

¹⁶Napa na-hanggàmaru na tana na ma-maràmbangu bidi mini kanguraku mata, dàngu da matau bokulungu mambabu lundu waihangu.

¹⁷Na-paura na paraingu ma-maràmbangu pa-mahumbarungu, da matau bokulungu mangangu la rehi ngangu, nda da-mbuhangu pa-maüku dàngu dapingu pa-roputu wikida.

¹⁸Na toku ndidingu na jiri jàka nda pa-pahàmu-ya, la hupu njàpuna namobu na uma ruku patai eti.

¹⁹Na mbabu natuu pariki wàngu, dàngu na wai angguru natuu pa-hawola wàngu. Tàka ningu bàdi àmahu pakei wàngu.

²⁰Àmbu panjala hanganji, jiapa ka la eti. Àmbu pa-akangu mawulu jiapa la kurungu wikimu. Talànga wanguna ningu heu ma-hawurungu marongu-ya na papanii-mu, tàka hi na-patàka-nya na palaa-mu.