Read Kambera MA-PABOBARUNGU 11 Bible Online

MA-PABOBARUNGU 11 - Kambera bible

MA-PABOBARUNGU 11

¹Patama-nja da àmahu-mu la mawingu àmahu la hili hau tana. Jiangu-ma ungalangu utu la rehi malamiri.

²Patama-nja da àmahu-mu la ma - màtu danggangu; himbu pada - danguma mawingu àmahu. Ba lupangu na-rimangu bàdi na tau, ba ndedipa natàka-nya hanggàmaru.

³La nggi biaya na-hanggangu ningu na ai ba nanjoru, pa-daingu-mananya la ngia pambàpa-na. Jàka nambotu-ka la wai na karumangu, puru-nanyaka na ura kawalu la pinu tana.

⁴Nggamu ma-panedingu lundu na-lànyapu pàku na ndaungu dàngu na ngilu, nda jia tondungu-ana dàngu nda na-ngalangu-mbu ihi paraï-na.

⁵I Ala nawunda-ya mbuu ndàbana, tàka nda na-jàngapu-aya paraï tau; tuna numbu ba nda na-jàngapu-ya la kanandingu-na nggiki hama tumbuna na luri bidi daa la kambu haàtu ina.

⁶Hàbaru-nja da winimu la mbaru dàngu àmbu jia pànjangu dumu la rudungu. Ba nda tapi-anya nggiya na matumbu hàmu. Talànga wanguna da tumbu hàmu ndàba pa-kadua-da.

⁷Na harii mata lodu natuya na pa-ohangu; kanjupu hàmu-aya jàka tapàda-nya.

⁸Lupangu upamalangungu-ma bàdi jàka na-mbonjangu na ndaungu lurimu. Na nyuna, jiapa-kai kau luri mandai la pinu tana, namu-maya bàdi ba rihi mandaipa na rehimu la pangia meti. Ba tuna, ka nggàra-yaka na pahili monungu? Mbuu ndàbana nda ningua linguna kahewa-ma-ana.

⁹Pàda-nyawa na rehi bidi taumu, ha bidi mini! Hawola-wa ba talànga bidi tau-kaupa. Pahàra-nya mbuu ndàba na pambuha etimu, wunda-yawa mbuu ndàba na pawuku etimu. Na nyuna namuya ba ninya i Ala la awangu, napa na-patanda-nja mbuu ndàba da pawunda-mu.

¹⁰Wàngga-yawa na nggidiku dàngu na handuka welingu la etimu, ba narengga làpahu na rehi bidi taumu.