Read Kambera MA-PABOBARUNGU 12 Bible Online

MA-PABOBARUNGU 12 - Kambera bible

MA-PABOBARUNGU 12

¹Namuya na mawulu-kau ba talànga bidi tau-kaupa, ba ndedi datàka da ndaungu mayila. La rehi nu napa upanii, “Na luringgu nda na-lànyapu-a,” wàmu.

²Jàka natàka-ka na rehi nuna, nda da-maninggiru-apa da wua matamu, hi lupangu naaü na hambila mata lodu, wulangu dàngu kandunu. Na karumangu timbi mangàndi urangu, nandutu mànukau beri ma-pangàdungu-ya.

³Da-kandàndaku da limamu dàngu nda daopa-anggaupa. Da wihimu da ma-kapingatu da-mbembatu. Nda damàtu-apa da nggàndumu panyama wàngu pangangu. Da-hambala da matamu hi na-lamaru bau tàngaru.

⁴Na kayànggaku la ànda wàngu parongu kalu-ayaka. Da linguda da malingu pambabu wàngu dàngu nggihu utika panda ronguha. Nda peku mahuru mangandu-amupa. Da pini ma-hawurungu-a upawàla wàmbu-njaka.

⁵Umangginggitu la pa-kandekalu majangga dàngu hi lupangu upangga pananjarungu. Na lunggimu na-uwangu dàngu uyilaha da wihimu bau pangga. Ka màli-nanyaka mbuu ndàba na patikingu-mu dàngu na rinjungu-mu. Hanggangu-ndanyaka la pangia-nda na mangia hupu dehi, hi da-handuka dàngu dahii da tau la ànda.

⁶Na halaku lulungu napa nambota hi napai - ihangu; na palita àmahu rara na-kanabu hi nambera; na liku pataku wàngu nambota hi naruha; nambera na kadihi hi na-tanyalangu.

⁷Na ihinda napa, kumburu tana beliya. Na kayeku lurinda napa nabeli-ya lai Ala. Nyuna na ma-wuangu-ya ba wua juangu-nanya.

⁸Mbuu ndàbada nuda kahewa-ma-ana wànggu, mbuu ndàbada kahewa-ma-ada nda ningua ihida.

⁹I Ma-tanjiku Kanandingu na-paeti dàngu na-manggàna. Tuna nuduka hi na-papeka-nya na banjaru, mbuu ndàbana na papi wàna. Dadangu da pangerangu pa-papeka-na hàlaka hi na-manginjiru-ha pa-deningu-da.

¹⁰Na-pamukarungu la pahunggu lawiti omba eti, da lawiti pa-tulihu-na da-padeningu.

¹¹Na kareuku tau paeti hama tuna tokungu dàka haàtu tau ma-pawangu-ya, na tokungu pa-kahiri wànja da mbimbina. Da pangerangu pa-pauhingu dàngu da lii panaungu, beri paku ma-tanjiku madira mandungu-ha. Mbuu ndàbada nuda pawua-na i Ala-mbuha, na Mini Pawangu-nda na manda ningu menjana.

¹²Dou na ananggu, hangia-napa na pa-pananjaru-mu. Na ngera tulihu mbuku nda ningua dirana, dàngu jàka lalu danguna na pa-pekangu na-panjili tolu dàngu ndewa.

¹³Ba ku-pangàda-njaka mbuu ndàbada, yiana-yaka na ihi mbulungu-na na pahunggu-nggu. Mangàdatu-nyawa i Ala dàngu nunjuha-wa da hupu liina, ba ndumangu na matungu nu jua-a hi nawulu-ya na tau.

¹⁴Napa na-patanda-nja ngera mbuu ndàbada da pawunda-nda paraïna i Ala; da mahàmu dàngu da manda hàmu, dàngu da ma-kawiningu-mbu.