Read Kambera MA-PABOBARUNGU 3 Bible Online

MA-PABOBARUNGU 3 - Kambera bible

MA-PABOBARUNGU 3

¹Mbuu ndàba da manjadi la pinu tana yiana danjadi la rehi pa-kawuku-na i Ala.

²I Ala na-kawuku-ya na rehi habola dàngu na rehi meti, na rehi tondungu dàngu na rehi buta,

³na rehi pameti dàngu na rehi pahàmu, na rehi nyànggaru dàngu na rehi pahadangu.

⁴I Ala na-kawuku-ya na rehi handuka dàngu na rehi hawola, na rehi hawina dàngu na rehi renja,

⁵na rehi pa-angungu dàngu na rehi nda uku pa-paangungu, na rehi parohu dàngu na rehi roputu wiki.

⁶I Ala na-kawuku-ya na rehi hunggu dàngu na rehi mbulangu, na rehi kangutungu dàngu na rehi borakungu,

⁷na rehi hira dàngu na rehi utu, na rehi kandii dàngu na rehi kareuku.

⁸I Ala na-kawuku-ya na rehi panamu dàngu na rehi paumbingu, na rehi pabera dàngu na rehi papeku.

⁹Nggàra-yaka na wunda njilinda?

¹⁰Kupinya ba nawua-nda buku mbotu i Ala.

¹¹Na-kawuku-ya na rehi ma-jàngapu ndumana mbuu ndàbana. Nawua-nda rinju eti la papinya na rehi na manàmu-nya, tàka nda jia jàngapu-andanya mbuu ndàba da pawunda-na i Ala welingu la pakiri-na lundu la hupu njàpuna.

¹²Kupinya ndumanda nyuta, ba nda ningua marihi pahàmu welingu la pa-hawola dàngu la papàda hàmunya na luri la ngala lurinda.

¹³Nahàmu-pa nyuta mbuu ndàbanda ka tangangu ka ta-ngunungu dàngu la papàda hàmunya na ihi paràma-nda. Nuda nu pawua-na i Alaha.

¹⁴Kupi-manya mbuu ndàba da pawunda-na i Ala ba da-padaingu lundu nu - nu. Nda peku bonja-ananya jàka ndia nda peku pa-kawawaku-ananya paraï tau. Hi tuna nu na pawunda-na i Ala ka peku mangàdatu-ndanya Nyuna.

¹⁵Na manjadi la rehi nàhu mbàda njadi-naka la mangilu. Na maninya la rehi na manàmu-nya, mbàda ni weli ndai-manyaka. Mbàda kawuku-nanyaka paraïna i Ala, ka nahili njadi na mambàda njadi.

¹⁶Hili ninyapa na paita-nggu la pinu tana yiana: la ngia paninya na mola dàngu na hàmu làti, lai nu ninya na akatu.

¹⁷I Ala na-patanda-nya na tau hàmu hamangui na tau akatu-mbu, wànggu la kanandingu-nggu, nadu na manjadi-ka dàngu na pawunda - pawunda-ka napa da njadi la rehi pa-kawuku-na i Ala.

¹⁸Ku-jàngapu-ya la kanandingu-nggu: ba manginjiru-nanda i Ala la pa-paloha-ndanya ba nda ningua hekangu-nda welingu la ngera banda.

¹⁹Jiapa ka nggi - nggikina kadu, na ngera tau dàngu na ngera banda hama-ma-ada. Na tau nameti, tuna numbu na banda. Hama-ma-ada ba pa-padikangu-ha. Ba tuna, na tau nda narihi-a pautu welingu la banda, nadu na lurida ba kahewa-ma-ana.

²⁰Hama-ma-ana na ngia pa-hanggangu-da. Ba welida la kumburu tana jiangu-ma dabeli la kumburu tana.

²¹Nda tapi-anya nyuta jàka naheiya hu dita na ngahu tau dàngu jàka na puruya hu daa la tana na ngahu banda.

²²Jia ba tuna, kupinya ba nda ningua marihi pahàmu ndumana na tau welingu la papàda hàmunya na ihi paràma-na. Hinggilu-na nuna nda hili nggàra-a pawunda-na. Nda jia pi-ananya jàka nggàraya na manjadi la taliu metina.