Read Kambera MA-PABOBARUNGU 4 Bible Online

MA-PABOBARUNGU 4 - Kambera bible

MA-PABOBARUNGU 4

¹Hàlaka kuhili hamata-ya mbuu ndàba na nda mola na manjadi la pinu tana yiana. Ba dahii da tau pa-kapidihu dàngu ba nda ningua ma-mbuhangu pandula-ha. Nda haàtu-ma ma-mbuhangu patula-nja, ba ningu kawaha bokulu-da da tau ma-pakapidihu.

²Oha-daika nyuda wànggunja da tau da mambàda meti mandai nadu ba darihi pa-ohangu-pa welingu la tau maluri-ipa.

³Tàka na mahili rihi pa-ohangu jiaha da tau mandedi dedi, nadu ba ndedi daita-duya na akatu pawunda la pinu tana yiana.

⁴Kupi-manya hi natika paràma pa-mbangatungu na tau mbulungu-ma-ana oha-naika nyuna wàna ba naita-ya na ihi paraï-na na angu kotaku-na. Mbuu ndàbada nuda kahewa-ma-ana hama tuna ba kehangu ngilu.

⁵Langatàka-ma mbulungu tau ndubama-a ma-mandapu hangoturu dàngu na ma-patia-nya na meti rimbangu.

⁶Talànga wanguna na-deningu ihu nuna, tàka narihi-pa pahàmu jàka hakudu malanja pa-kariangu mambiru welingu ba ràma pa-mbangatungu ba kadua mbapangu dàngu ba yàpa ngilu.

⁷Hili ningu-mapa ma-kahewa-na la luri pinu tana yiana.

⁸Ningu tau maluri ndora meha manda ningu anangu, jàka ndia angu dedina. Jiapa-kai ba tuna nutakungu-mananya paràma pa-mbangatungu dàngu nda nahoda-aya malanja na etina. Ngga nduma-nanyaka ba na-lundungu wai hanggobu-na dàngu ba na-wiliru-nya mbuu ndàbana na pa-hawola wàngu? Nuna nu kahewa-mbuna dàngu huri luri mayila-ya.

⁹Rihi utupa jàka tau madua welingu ba pa-mehangu. Jàka daràma, narihi hàmu-mapa na ihi paràma-da.

¹⁰Jàka nanjoru na haàtu, peku ndula-nanya paraïna haàtu. Tàka jàka didi meha-aya jàka nanjoru, hanggàmaru-madua-nanyaka, ba nda ningua mapeku pandula-ya.

¹¹La rudungu maringu, da tau madua ma-katuda palihi peku marangga pa-mamitungu-da, tàka nggiki pa-mamitungu-na wikina na tau jàka didi meha-aya?

¹²Tau madua malaku pa-kariangu peku tebuku-danya na ma-pahànjalu, tàka na tau ma-pamehangu namuda pa-pakàku-ya. Tailu walangu liku paputi ilangu, nda namuda pabota-ya.

¹³Na tau mila peku njadina hanganji, dàngu na tau tanawangu pekuna pa-lelingu la kanjàka pareta. Na nyuna la rehi kaweda-na na hanganji nuna lalu ndubaya pa-kataku lii panaungu, ba tuna nangera-na narihi nda hàmupa welingu la bidi tau mamila, na nyuna na pingu.

¹⁵Ku-pangàda-nya rukuna mbuu ndàbana na tau la pinu tana yiana, ka pi-dunggu-nyaka la hongada lupangu-ma ningu haàtu bidi mini mahilu hanganji.

¹⁶Talànga wanguna nda pataü-aya danguna na rayatu pa-kapipi-na, tàka jàka taliu-naka, nda ningu ma-pamalangu-nya paraï na hàmuna. Deningu-mana, mbuu ndàbana kahewa-ma-ana, hama tuna na pa-mukarungu pa-kehangu ngilu.

¹⁷Pa-nanjarungu-ma jàka lua la Umana i MIRI. Narihi hàmupa jàka lua lai nu pa-papekangu, welingu ba lua pawotu kameti maraku, hama tuna na pawunda-da da tau nduba. Nyuda nda dapi-anya paheka-nya nggiya na ma-deningu dàngu nggiya na manjala.